Градоначалникот на Дојран, Анго Ангов, во изјава за ТВ Телма рече оти има индиции дека пожарот на депонијата е подметнат, но за тоа, како што додаде, остава надлежните органи да преземат одредени постапки
Повеќе од 30 пожари денеска беснеат на територијата на државата од кои 15 се сè уште активни, меѓу кои и огнената стихија која избувна кај Дојран и за кратко време почна да се шири на сите страни, а која според последните информации почнува да се става под контрола од страна на противпожарните екипи.
Огнот кој избувна на депонија кај населбата Карач предизвика паника кај тамошното насление, кое беше евакуирано, а според првичните информации беа зафатени три куќи во населбата.
Градоначалникот на Дојран, Анго Ангов, во изјава за ТВ Телма рече оти има индиции дека пожарот на депонијата е подметнат, но за тоа како што додаде остава надлежните органи да и преземат одредени постапки.
„Се соочуваме со навистина голем пожар. Дојде и воен хеликоптер на Армијата да помогне во гасењето, меѓутоа ветрот прави големи проблеми и навистина многу бргу се шири овој оган“,
изјави Ангов.
Во врска со трите зафатени од огнот куќи во наслебата Карач, градоначалникот вели дека и покрај брзата интервенција на противпожарните екипи кои дошле од целиот регион да помогнат не успеале да ги спасат куќите.
„Тоа се три куќи кои се во населба Карач, таму живее локално население коишто за жал и покрај брзата интервенција на противпожарните екипи коишто дојдоа од целиот регион да помогнат, самиот ветер направи проблем и го префрли огнот многу бргу. Не успеавме да ги спасиме тие куќи, сега мислам дека пожарот полека се става под контрола и се надеваме дека набргу ќе ни дојде поголема помош бидејќи навистина станува збор за многу голем пожар“,
изјави градоначалникот на Дојран.
Тој додава дека во случајот можело малку побрзо да се реагира од Центарот за управување со кризи и од Дирекцијата за заштита и спасување.
„Чекавме доста време за испраќање на хеликоптери и авиони и пожарот многу бргу се рашири поради временските услови, како што напоменав“,
рече Ангов.
Од друга страна директорот на Центарот за управување со кризи, Стојанче Ангелов, во својата пладневна изјава која ја даде од место над Дојран, рече дека во пожарот не се изгорени куќи.
„Моментално се наоѓам над Дојран, каде утрово изби пожар од депонијата којшто ја зафати околната вегетација и се прошири кон околната населба. За среќа немаме изгорени куќи, туку само една или две куќи коишто се благо зафатени од огнот и имаат сосема мали оштетувања“,
рече Ангелов.
Претходно денеска по избувнувањето на пожарот во Дојран заменик-генералниот директор на „Национални шуми“, Кире Михаилов, побара противпожарните служби од Гевгелија, Валандово и Богданци да помогнат во справувањето со огнот кој е во близина на селото Николиќ.
Михаилов вели дека депонијата кога била запалена била заклучена и немало чувар. Поради тоа, екипите на Територијалната противпожарна единица не биле во можност да влезат веднаш во депонијата и да го спречат првичниот пожар да се прошири кон местото викано Карабалија. Поради ветрот, додава Михаилов, огнот се доближува кон Стар Дојран и е надвор од контрола.
Михаилов, во објава на својот фејсбук-профил, побара одговорност од градоначалникот на Општина Дојран, Анго Ангов, затоа што депонијата била заклучена и без чувар.
Од денешните пожарни, како тешки, директорот на ЦУК, Стојанче Ангелов, ги посочи пожарите на територијата на Дојран и на територијата на Свети Николе, кои биле неколку.
„Најголемата пожарна линија се движи од Свети Николе во насока на општина Куманово и моментално таму делуваме со трите ‘ертрактори’. Пожари имаме на територијата на Старо Нагоричане коишто се закануваат да зафатат неколку напуштени села од разбиен тип со стари куќи, но и обновени куќи. Исто така имаме пожари и на територијата на општина Куманово, на територијата на општина Пробиштип, на територијата на општина Кочани, но и на другите места“,
вели директорот на ЦУК.
Тој повторно упати апел до сите кои ќе се затекнат во села кон кои се ближи пожар да се евакуираат на безбедно.
„Апелирам сите лица коишто ќе се затекнат во села кон којшто се ближи оган, а каде што не организирана одбрана на селото од локалните власти итно да се евакуираат на безбедно место, да не чекаат до последен момент и да не се изложуваат на непотребен ризик по нивниот живот и здравје. Нови куќи ќе се направат, но животот на луѓето не може да се врати“,
изјави Ангелов.