Не можам да тврдам, но има перцепција дека во МАНУ нема пристап за други етнички заедници, вели Муртезани

Според министерот за европски прашања, сегашната структура на МАНУ е доволна основа да се дојде до заклучокот дека таму етничката припадност е клучниот фактор за пристап, а не стручноста и науката

Идејата на коалицијата „Вреди“ да се формира „Албанска академија на науката и уметноста“, според министерот за европски прашања Орхан Муртезани, е изборно ветување кое било напишано.

Муртезани вели дека на овој проект не треба да се гледа дека е тенденциозен кон одредена етничка заедница.

„Станува збор за изборно ветување, тоа е напишано и ветено пред граѓаните. На овој проект не треба да се гледа како на тенденциозен, односно проект што е насочен кон одредена етничка заедница. Станува збор за проект што треба да создаде одреден простор за развој на науката, културата. Меѓутоа, останува да се види како тој проект, односно тоа ветување може да се реализира во склоп на законската регулатива“,

рече денеска Муртезани одговарајќи на новинарско прашање.

Според Муртезани, сегашната структура на МАНУ е доволна основа да се дојде до заклучокот дека таму етничката припадност е клучниот фактор за пристап, а не стручноста и науката.

„Јас само ќе споделам дел од перцепцијата на мнозинството Албанци. Перцепцијата е таква дека во МАНУ нема пристап за научници од другите етнички заедници. Меѓутоа, немам конкретна информација бидејќи не работам во МАНУ и не можам да тврдам дали е така или не“,

рече Муртезани.

По најавите за формирање „Албанска академија на науки и уметности“, кои предизвикаа бурни реакции од политички партии, институции и поединци, вчера се огласија од Македонската академија за науките и уметностите (МАНУ).

Оттаму излегоа со соопштение во кое посочија дека МАНУ отсекогаш била отворена за сите граѓани кои ги исполнуваат високите научни и уметнички критериуми за членство во неа, независно од етничката, верската и каква било друга припадност.

„За политичките партии и нивните влијанија никогаш немало место во неа“,

велат од МАНУ.

Македонија, како и секоја земја, има една национална академија, реагира МАНУ и апелира да не биде вовлечена во партиски дискусии

Лидерите на коалицијата „Вреди“, која е дел од власта, викендов од Тетово најавија дека ќе се обезбеди општинско финансирање на здружението „Албанска академија на науките и уметностите“. Општинското финансирање, како што порачаа од „Вреди“, треба да биде привремено решение, а ќе бараат академијата да се финансира од државниот буџет.

„Вреди“ тргнува да прави државна „Албанска академија на науките и уметностите“

Реакции стигнаа од партиите од власта, ВМРО-ДПМНЕ и ЗНАМ, од каде што порачаа дека МАНУ е единствената институција во државата и дека не смее да се прави паралелизам.

ВМРО-ДПМНЕ по најавите за „Албанската академија“: МАНУ е единствената научна институција и има научници од различни етнички заедници

Идејата на „Вреди“ не наиде на поддршка ниту од опозициската СДСМ, а според ДУИ намерата за формирање „Албанска академија на науките и уметностите“ е идеја која ги понижува Албанците бидејќи „Вреди“ требало да го преземе управувањето со (МАНУ), а не како што велат, да дојдат до „големата општинска идеја“.

За ДУИ здружението што го поддржа „Вреди“ е „квазиопштинска академија“

„360 Степени“ објави дека од регистрациските податоци за правниот субјект поднесени во Централниот регистар може да се види дека станува збор за здружение на граѓани кое е основано на 15.2.2022 година. Вистинското име му е поинакво од она што беше претставено на средбата со „Вреди“ и гласи „Академско здружение за наука и уметност на Албанците“, а не „Албанска академија на науките и уметностите“.

Кое е тетовското здружение од кое „Вреди“ сака да направи државна „Албанска академија на науките”