Има многу имиња од кои може да се избере. Во моментов се разгледуваат имиња, се разгледуваат случаи, се следи ситуацијата воопшто. Нема конкретен датум кога тоа би се случило, вели амбасадорката Агелер прашана за проширувањето на т.н. „црна листа“ на САД
Американската амбасадорка во Северна Македонија, Анџела Агелер, денеска во Штип изјави дека т.н. „црна листа“ на Соединетите Американски Држави (САД) постојано се ажурира и дека и во моментов се разгледуваат имиња што би можеле да завршат на неа.
„Таканаречената ‘црна листа’ е нешто што се прави согласно нашите закони. Станува збор за листа која е динамична и која постојано трпи промени. Има многу имиња од кои може да се избере. Во моментов се разгледуваат имиња, се разгледуваат случаи, се следи ситуацијата воопшто. Нема конкретен датум кога тоа би се случило“,
рече Агелер.
На новинарско прашање за реформите во правосудниот систем, Агелер одговори дека тие секако се потребни, но треба да се спроведат многу внимателно.
„Секоја реформа, вклучувајќи го и Судскиот совет или воопшто судството, треба внимателно да се направи. Постои патоказ од Европската Унија за ова прашање и ние сме тука за да помогнеме во процесот. Мојот заклучок за прашањето дали се потребни реформи во судството е – да, апсолутно се потребни“,
рече таа.
Премиерот Христијан Мицкоски, пак, денеска изјави дека тој е за реформите да се случат веднаш.
„Не може да имате рејтинг од два процента, јас кога би имал рејтинг од два процента, би си заминал. Тие наместо да си заминат и да има одговорност, тие грчевито се борат за фотелјите. Подготвен сум да зборувам со секој. Со амбасадорот Гир имаме одлична комуникација и за оваа тема. Апсолутно стојам на ставот дека треба нешто да се направи. Не може да продолжиме да живееме во држава во која моќници на ушка им седат на обвинители“,
рече Мицкоски.
Премиерот Мицкоски, амбасадорката Агелер и министерот за одбрана Владо Мисајловски денеска во касарната „Јане Сандански“ во Штип присуствуваа на помоција на новите шест лесни оклопни возила JLTV.