На петгодишнината од настаните во кумановско „Диво Насеље“, премиерот Оливер Спасовски, кој е од Куманово, порачува: „Сигурен сум дека нарачателите имале подмолна намера, но присебноста на граѓаните не им дозволи да ја остварат“.
„Два дена Куманово и целата земја, во страв и неизвесност, го исчекуваа епилогот од вооружената пресметка во која животот го загубија осум припадници на Министерството за внатрешни работи Љубиша Аранѓеловиќ, Бобан Ивановиќ, Горан Илијевски, Жарко Кузмановски, Исамедин Османи, Сашо Самојловски, Ненад Серафимовски и Горан Стојменовиќ. Слава им! Исклучително вознемирувачки и трагичен настан, кој подоцна во судските архиви беше заведен како „терористичко загрозување на уставниот поредок и безбедност“,
пишува Спасовски на „Фејсбук“.
Премиерот додава дека „овој трагичен настан засекогаш ќе остане длабока траума на моите сограѓани на Куманово и за граѓаните на нашата земја“.