Коментирајќи ја изјавата на вицепремиерот на Косово, Бесник Бислими, кој рече дека има „информации дека Борел подготвил извештај и оти предложил укинување на мерките против Косово“, Стано повтори дека први за содржината на документот ќе дознаат членките на ЕУ
Рокот за поднесување на извештајот на европскиот шеф на дипломатијата, Жозеп Борел за чекорите преземени од Косово за исполнување на неговите обврски и содржината на тој извештај се меѓуинституционални прашања на Унијата и за нив не можат да разговараат актери надвор од блокот, изјави денеска портпаролот на ЕУ, Петер Стано.
Стано, одговарајќи на прашања за тоа кога може да се очекува да биде доставен извештајот и каква ќе биде неговата содржина, потсети дека членките на ЕУ го побарале тој документ од високиот претставник.
„Извештајот на високиот претставник беше даден како задача од советот, така што земјите-членки побараа од високиот претставник да им достави извештај. Тие земји први ќе знаат што содржи извештајот. Тоа се уште не се случило“,
рече Стано.
Според портпаролот на ЕУ, Петер Стано, во извештајот се работи за динамиката на институциите на ЕУ и додава дека никој надвор од ЕУ не треба да шпекулира за содржината и временската рамка, пренесува регионалниот сервис на Радио Слободна Европа.
Коментирајќи ја изјавата на вицепремиерот на Косово, Бесник Бислими, кој рече дека има „информации дека Борел подготвил извештај и дека предложил укинување на мерките против Косово“, Стано повтори дека први за содржината на документот ќе дознаат членките на ЕУ.
„Ќе се разговара, а потоа ќе се донесат неопходните одлуки. Не гледаме потреба од шпекулации од различни актери“,
рече Стано, предупредувајќи дека за поднесувањето на извештајот ќе бидат информирани и косовските власти.
Минатата недела вицепремиерот и главен преговарач на Косово во дијалогот со Србија, Бесник Бислими изјави дека има информации оти во извештајот на Борел е препорачано укинување на мерките на ЕУ кон Косово.
Во собраниската Комисија за евроинтеграции, Бислими рече дека „содржината на извештајот е позитивна“, јави дописникот на МИА од Приштина.
„Извештајот на господинот Борел е предуслов за зачленување во Советот на Европа, тој беше изготвен во април, но имаше двоумење да се испрати до Комисијата. Извештајот требаше да биде доставен (на 11 јуни), но дел од Комисијата побара мало одложување. Информациите што ги имам се дека содржината на извештајот е позитивна и препорачува укинување на мерките“,
рече Бислими.
Пред повеќе од една година Европската Унија воведе казнени мерки против Косово, по ескалацијата на ситуацијата на северот од земјата.
ЕУ оцени дека Косово не презело доволно чекори за да избегне конфликт.
Стано уште еднаш повика да се преземат сите мерки за намалување на тензиите во северниот дел на Косово и сите страни да се воздржат од поттикнување и еднострани акции.
„Очигледно, ние сме загрижени за ситуацијата на северот на Косово, бидејќи во минатото видовме еднострани, некоординирани чекори кои доведоа до нова ескалација. И ова е поврзано и со прашањето на мерките. Продолжената ескалација резултираше со мерки на ЕУ“,
рече Стано.
Двете страни во Брисел водат дијалог за нормализација на односите од 2011 година.
Со посредство на ЕУ во 2023 година беше постигнат Договор за нормализација на односите кој е познат како Охридски договор.