Во врска со обврските на државава на нејзиниот пат кон ЕУ, во изјавата експлицитно не се наведуваат уставните измени, кои се услов за одржување на втора меѓувладина седница на земјава со ЕУ, по што следува отворањето на преговарачките кластери. Оваа тема од двајцата високи функционери на Унијата е спомната во завиена форма
Шефот на европската дипломатија Жозеп Борел и еврокомесарот за проширување и соседска политика Оливер Вархеји, во заедничка изјава, од името на Европската Унија (ЕУ) и ја честитаа победата на Гордана Силјановска-Давкова на претседателските избори.
Во овој контекст тие додаваат дека Унијата со нетрпение учекува да работи со новиот претседател – првата жена шеф на државата во Северна Македонија.
Во заедничката изјава, Борел и Вархеји упатуваат повик на охрабрување до, како што велат, релеватните политички актери да работат на формирање парламент и стабилна влада.
„Двете институции треба да работат заедно за да го унапредат патот на Северна Македонија кон ЕУ, вклучително и со спроведување клучни реформи особено во областа на владеењето на правото и борбата против корупцијата, во интерес на сите нејзини граѓани“,
се вели во изјавата.
Во врска со обврските на државава на нејзиниот пат кон ЕУ, во изјавата никаде експлицитно не се наведуваат уставните измени, кои се услов за одржување втора меѓувладина седница на земјава со ЕУ, по што следува отворање на преговарачките кластери.
Оваа тема од двајцата високи функционери на Унијата е спомнта во завиена форма.
„Северна Македонија направи одлучувачки чекори во процесот на пристапување во ЕУ и сега ќе биде важно да се имплементираат преостанатите обврски неопходни за отворање на првиот кластер во процесот на пристапување“,
се наведува во изјавата.
Во неа дополнително е посочена оценката дека ЕУ и Северна Македонија споделуваат силно партнерство и оти земјата целосно е усогласена со заедничката надворешна и безбедносна политика на ЕУ.
„Очекуваме нашата соработка да продолжи и понатаму да се развива“,
велат Борел и Вархеји.
Инаку, во изјавата тие се осврнуваат и на изборниот процес, одржан на 8 мај, повикувајќи се на наодите и заклучоците на меѓународните набљудувачи.
Според прелиминарните наоди и заклучоци на Канцеларијата на ОБСЕ за демократски институции и човекови права (ОДИХР), изборите поминаа во мирна и демократска атмосфера, беа конкуретни и во нив беа почитувани основните слободи, иако забележуваат дека процесот останува недоволно регулиран.
„ЕУ забележува дека заедничката меѓународна набљудувачка мисија на изборите од ОДИХР и ОБСЕ, Европскиот парламент и Парламентарното собрание на Советот на Европа ги окарактеризира изборите како конкурентни и со почитување на основните слободи. Изборната администрација ефикасно ги организираше изборите. Медиумската средина беше генерално бесплатна. Иако законската изборна рамка ја постави основата за демократски избори, некои одредби не беа во согласност со меѓународните стандарди, во однос на еднаков пристап до медиумите, одговорност за државното финансирање и пристап до правна заштита. Неодамнешните измени на Изборниот законик беа воведени доцна и не ги одразуваа препораките на ОДИХР“,
се вели во заедничката изјава на Борел и Вархеји.
На крајот во неа тие наведуваат дека откако меѓународната мисија за набљудување на изборите ќе излезе со своите конечни препораки за идните избори, Европската Унија очекува сите политички актери, релевантни институции и засегнати страни да ја покажат својата посветеност за зајакнување на демократијата преку заедничка работа за брзо спроведување на тие препораки и многу порано пред следните избори.
Инаку, апсолутен победник на двојните избори – претседателските и парламентарните е ВМРО-ДПМНЕ.
Според првичните официјални резултати од 100 отсто пребројани гласови од вториот круг на претседателските избори, кандидатката поддржана од ВМРО-ДПМНЕ, Гордана Силјановска-Давкова, освои 561 001 глас, додека нејзиниот противкандидат, актуелниот претседател на државата кој со поддршка на СДСМ се бореше за втор мандат, има 251 881 глас.
На парламентарните избори, според првичните официјални резултати на ДИК, коалицијата „Твоја Македонија“ предводена од ВМРО-ДПМНЕ е со најмногу освоени пратенички мандати – 58. Потоа следуваат коалицијата „Европски фронт“ предводена од ДУИ со освоени 19 пратенички мандати, коалицијата „За европска иднина“ предводена од СДСМ со 18 мандати, коалицијата на опозициските партии на Албанците „Вреди“ има 13 пратеници, Левица – 6 и „Движење ЗНАМ – За наша Македонија“, исто така, шест мандати.
Лидерот на ВМРО-ДПМНЕ и извесен мандатар за состав на идната влада, во синоќешното интервју за Канал 5, говорејќи на темата Бугарија и уставните измени, рече дека нивниот став по ова прашање е јасен, но ако Бугарија не е подготвена да отстапи од своите позиции, тогаш, како што посочи, би се свртеле кон исполнување на домашната агенда и ќе чека нова гарнитура во Софија.
„Не влегуваме во овој процес заради политичка гимнастика или да покажеме колку сме цврсти. Ние едноставно не веруваме дека ова е вистинскиот процес. За процесот да биде вистински, треба од другата страна да имаме јасен план. Ние немаме јасен план, освен гола реторика и ‘видете, треба да ни верувате‘. Чекајте, ние ви веруваме повеќе од две децении“,
рече тој.
На прашањето дали говорите за Европска Унија или за Бугарија, Мицкоски вели дека Европска Унија е таа која го води овој процес, а Бугарија е само дел од него.
На новинарската констатација дека ЕУ вели дека измените на Уставот мора да се направат и автоматски ќе ги продолжиме преговорите, лидерот на ВМРО-ДПМНЕ рече: „Добро, но тоа ќе биде дента кога ќе влеземе во Европската Унија. Ајде, сега да разговараме што од овој момент ќе правиме“.