Драги Ѓоргиев, ко-претседавачот од македонска страна на заедничката историска комисија со Бугарија за „360 степени“ објаснува зошто не е изненаден од последните условувања од Софија – комисијата да ги реши отворените прашања меѓу двете земји па да има напредок во евроинтеграциите на Северна Македонија.
„Сите недоразбирања што Бугарија ги има со Македонија во однос на историските контроверзи ќе настојува да ги реши во своја корист. Тој притисок веќе се чувствува и ќе станува силен, сметам дека Бугарија нема лесно да отстапи од тие свои позиции зашто може да ги наметнува и според неа таа има некои историски, помалку неоправдани барања кон Македонија. Бугарското врзување на просперитетот на Македонија со преговорите со ЕУ со успехот, работата на историската комисија мислам дека е контрапродуктивно за односите меѓу двете земји. Не може тие контроврезии од 7 децении да се решат во 2 до 3 месеци работа на комисијата“,
вели Ѓоргиев.
Наспроти бугарското инсистирање за затворање на прашањата, Ѓеоргиев смета дека досега комисијата успеала да постигне напредок за неколку клучни личности од историјата. Меѓу нив не е и Гоце Делчев.
„Постигнавме договор за Цар Самоул, за Кирил и Методиј, за Свети Наум и Свети Климент, па дури и за Григор Прличев од кој подоцна се откажа Бугарија. За година и пол работа, постигнување договор за 4-5 личности, мислам дека е извонреден успех. А сега да се инсистира да се постигне договор за плејада личности во краток период е нереално. Истовремено, мислам дека големиот број личности и настани кои би се славеле заеднички меѓу Македонија и Бугарија, исто така, би било контрапродуктивно. Не можеме да дозволиме секој месец славење за некоја личност со Бугарија“,
вели Ѓоргиев.
Според него дебатата за идентитетот на Делчев ќе продолжи и понатаму, но и дека нема проблем тој заеднички да се чевствува.
„Делчев е национален херој и во Македонија и во Бугарија, значи тој е споделена личност меѓу двата народа и меѓу тие два наратива. Но, од друга страна, Делчев кај Македонците е најголем историски мит – за Макеонците не постои поголем мит од Делчев. Тој е национален херој и за Бугарија, но таму на пантеонот, на врвот е Левски, па Христо Ботев, Делчев е некаде подолу. Ако се направи анализа ќе се види дека митот за Делчев е поприсутен кај Бугарите кои потекнуваат од Македонија, кои имаат македонско потекло. Митот за Делчев не е толку силен кај Бугарите кои немаат врски, корени со Македонија. Оттука, одвојувањето на Делчев од Македонија со нивното инсистирање да признаеме дека бил Бугарин од македонскиот народ е невозможно“,
вели Ѓоргиев за „360 степени“.
Прашањето за македонскиот јазик не било отворено во историската комисија. Би било апсурдно тоа да се случи, вели Ѓеоргиев, аргументирајќи дека со кодификацијата таа тема е затворена и нема зошто за неа да зборуваат историчари.
„По мене најголем успех што може Бугарија да постигне е во некоја фуснота да стои дека Бугарија го признава македонскиот јазик според Уставот на Северна Македонија. Тука би било најголемото попуштање на ЕУ. Се друго би било пораз за ЕУ, па дури би бил и порадикален, ако условот е да кежеме дека тој јазик не постои, тогаш јас не би ги ни почнал преговорите со ЕУ“,
дециден е Ѓоргиев.