Таа порача дека на овие избори не смее да биде направена грешка и повика да се излезе на гласање „за да се прашува народот“
Наместо да се надмудруваме кој ќе влезе во преамбулата, нужно е да донесеме нов устав, порача денеска на средба со граѓаните во Карпош кандидатката за претседател на Левица, Билјана Ванковска. Таа предлага современ и социјален устав.
„Тој Устав ќе биде современ, таков каков што ќе го донесеме за себе како политичка заедница која нема да биде делена по етнички квоти, со олигархии и етнотрибализам, туку социјален устав, заснован на принципите на социјална класна правда и еднакви можности“,
истакна Ванковска.
Таа порача дека на овие избори не смее да биде направена грешка и повика да се излезе на гласање „за да се прашува народот“.
Според Ванковска, неопходно е да се покрене постапка за излегување од НАТО-алијансата.
„Покренување на постапка за излегување од НАТО е неопходна. Како сиромашна земја која нема економски развој, а секоја година издвојува повеќе од 2 отсто од својот вкупен национален доход, само тоне во сиромаштија. Притоа она што го издвојуваме оди за финансирање туѓи војни. Сонцето и белите мугри на Рацин изгреваат на исток. Иако ни кажуваат политички мудрости дека сонцето излегува на запад, на запад се случуваат драматични работи, светот се менува и ние треба да гледаме на сите четири страни“,
истакна кандидатката за претседател на Левица пред карпошани.