Пред изјаснувањето, рускиот амбасадор во ОН, Василиј Небензија, рече дека Москва поддржува итен прекин на борбите во Газа, но не се согласува и го доведува во прашање јазикот што се користи во резолуцијата на САД
Советот за безбедност на Обединетите нации (ОН) денеска не ја прифати резолуцијата за итен прекин на огнот во Газа, како дел од преговорите за ослободување на заложниците што ги држи Хамас во Појасот, предложена од Соединетите Американски Држави (САД), јавуваат светските медиуми.
Резолуцијата за примирје во војната меѓу Израел и Хамас, која САД и Европската Унија (ЕУ) ја сметаат за терористичка организација, не доби „зелено светло“ бидејќи Кина и Русија, како постојани членки на Советот за безбедност (покрај САД, Велика Британија и Франција), гласаа против.
Американската претставничка во Советот за безбедност на ОН, Линда Томас-Гринфилд, изјави дека Русија и Кина не сакаат да гласаат за резолуцијата бидејќи, како што рече, попрво би сакале да го видат пропаѓањето на САД.
„Сакаме да видиме итен и одржлив прекин на огнот, како дел од договорот што води до ослободување на сите заложници што ги држат Хамас и другите групи, и кој ќе овозможи многу повеќе хуманитарна помош за спасување животи во Газа“,
рече Томас-Гринфилд во обраќањето до членовите на Советот пред гласањето за резолуцијата.
Резолуцијата на САД на Советот за безбедност, кој брои 15 земји членки, доби поддршка од 11 членки, три гласаа „против“, а една беше „воздржана“, пренесува регионалниот сервис на РСЕ.
Пред изјаснувањето, рускиот амбасадор во ОН, Василиј Небензија, рече дека Москва поддржува итен прекин на борбите во Газа, но не се согласува и го доведува во прашање јазикот што се користи во резолуцијата на САД.
Тој ги обвини американскиот државен секретар Ентони Блинкен и американската амбасадорка Томас-Гринфилд дека ја довеле во заблуда меѓународната заедница.
Претставничката на Обединетото Кралство во Советот за безбедност, Барбара Вудворд, пак, изјави дека е разочарана што Русија и Кина не ја поддржале американската нацрт-резолуција.
Таа нагласи дека нејзината земја ќе продолжи да прави сè што може за да испорача помош за Газа, но дека е потребен итен прекин на борбите за да се испрати потребната количина на помош во палестинската енклава.
САД, како клучен сојузник на Израел, претходно ставија вето на резолуциите на Советот за безбедност на ОН за Газа, а последниот таков случај беше во февруари.
Војната во Газа започна на 7 октомври 2023 година, кога милитантите на Хамас упаднаа на југот на Израел и убија 1 200 луѓе во Израел и зедоа над 250 други како заложници.
Во израелската воздушна и копнена кампања во Појасот Газа, која уследи по нападот, досега, според палестинските здравствени власти кои се под контрола на Хамас, се убиени повеќе од 31 000 Палестинци.
Голем дел од Газа е во урнатини, а повеќето од нејзините 2,3 милиони жители се раселени и се соочуваат со голема хуманитарна криза.