Поранешниот американски претседател и мала група негови блиски советници разговарале со унгарскиот премиер во резиденцијата на Трамп во Мар а Лаго, изјавиле упатени извори за Си-ен-ен
Унгарскиот премиер Виктор Орбан, десничарски националист, му изрази поддршка на неговиот долгогодишен сојузник Доналд Трамп за враќање во Белата куќа, објавија британските медиуми. Тие двајца доцна синоќа се сретнаа на Флорида.
Поранешниот американски претседател и мала група негови блиски советници разговарале со унгарскиот премиер во резиденцијата на Трамп во Мар а Лаго, изјавиле упатени извори за Си-ен-ен.
Еден од нив средбата ја опишал како „социјална“ без агенда, додека друг ја нарекол „пријателска“.
„Трамп и Орбан разговараа за широк опсег на прашања што ги засегаат Унгарија и Соединетите држави, вклучително и огромното значење на силните и сигурни граници за заштита на суверенитетот на секоја земја“,
се вели во соопштението од изборниот штаб на Доналд Трамп.
Орбан по средбата изјави дека само враќањето на Трамп во Белата куќа може да донесе мир во Украина.
„Потребни ни се лидери во светот кои се почитувани и можат да донесат мир. Тој е еден од нив. Вратете се и донесете ни мир, господине претседателе“,
напиша Орбан во објавата на социјалната мрежа Икс.
Унгарскиот премиер, на кој многу конзервативци во Соединетите држави му се восхитуваат поради неговата строга политика кон имиграцијата, поддршката за семејството и гласниот став во корист на националниот суверенитет, во видеото објавено на неговата страница на Фејсбук рече дека „за време на мандатот на Трамп од 2017 до 2021 година имаше мир на Блискиот Исток, а исто така и во Украина“.
„Доколку Трамп беше реизбран во 2020 година, немаше да има војна во Украина“,
кажа Орбан.