Во училиштата ќе се вратат само матурантите, кои ќе полагаат државна матура и во основни училишта, за да се обезбеди потребната дистанца
Поради пандемијата со ковид-19, учебната 2019/2020 година во Албанија ќе заврши без можност учениците и студентите да се вратат во училиштата.
Информацијата вечерва ја соопшти министерката за образование Беса Шахини. Таа посочи дека од следниот месец единствено матурантите ќе се вратат во училишните клупи, за да полагаат државна матура.
„Училиштата и универзитетите во Албанија, кои беа затворени на 9 март, ќе останат затворени поради ситуацијата предизвикана од глобалната пандемија, Ковид-19. Повторно ќе се отворат во септември“,
изјави Шахини.
Таа додаде дека училиштата ќе се отворат само за матурантите и тоа од 18 мај до 5 јуни.
„Одлучивме да ги отвориме училишта за полагање на предметите од државната матура, со почитување на социјална дистанца. Во училниците ќе се дозволува присуство на максимум 15 ученици. За таа цел, ќе користиме и објекти на основни училишта“,
рече министерката Шахини.
Посочи дека наставата од далечина за сите учениците од деветолетките и трите години на средните училишта ќе продолжи до 29 мај кога и завршува учебната година или две недели порано од вообичаено.
„Причина за донесување ваква одлука е големиот број ученици во училиштата. Дел од училишните објекти се урнати, а дел многу оштетени од катастрофалниот земјотрес во ноември, поради што во другите училишта наставата се одвиваше и во две смени. Затоа не можеме да обезбедиме социјална дистанца“,
објасни Шахини.