Како што објави вчера порталот „Икс“, Батон Хаџиу – познат албански аналитичар со потекло од Косово, Адриатик Келменди – новинар на косовската телевизија Клан, Бленди Февзиу – водител на популарното ТВ-шоу „Мислење“ (Опиниони) на ТВ Клан Албанија и Берат Бужала – директор и главен и одговорен уредник на косовскиот портал „Национале“, беа ВИП-гостите на ДУИ за време на вчерашниот избор на техничката влада
Здружението на новинарите на Македонија (ЗНМ) денеска упати реакција и барање за објаснување за непринципиелниот третман кон странски новинари во Собранието на РСМ до новоизбраниот претседател на Собранието, Јован Митрески.
„По пријава до ЗНМ од страна на новинари и според медиумски објави во текот на вчерашниот ден, четворица новинари биле привилегирани од страна на службите за сметка на новинарите и медиумските работници од домашните медиуми. Според видео прилогот и укажувањата на порталот ‘Икс’, четворицата странски новинари биле сместени да седат во дипломатскиот дел на терасата во пленарната сала и исто така во текот на нивната посета биле пренесувани со владини службени возила“,
стои во реакцијата на ЗНМ.
Од Здружението на новинари сметаат дека ова досега не било пракса и укажуваат дека со ваквите постапки се прави преседан кој може да остави впечаток дека некој е привилегиран за сметка на друг во новинарската фела.
„Ваквиот третман во најмала рака ги омаловажува останатите новинари и создава перцепција дека се влијае на странските новинари да известуваат во полза на домашните чинители од политичките партии во Собранието, додека, пак, нееднаквиот третман на новинарите придонесува за недостиг на транспарентност и отчетност. Привилегирањето на одредени новинари во однос на други од страна на службите на Република Северна Македонија предизвикува сериозна загриженост за слободата и интегритетот на новинарството во земјата. Таквото фаворизирање може да резултира со пристрасно известување, цензура и сузбивање на различни гласови, што на крајот ќе го загрози правото на јавноста за пристап до точни и непристрасни информации“,
децидни се од ЗНМ.
Како што објави вчера порталот „Икс“, Батон Хаџиу – познат албански аналитичар со потекло од Косово, Адриатик Келменди – новинар на косовската телевизија Клан, Бленди Февзиу – водител на популарното ТВ-шоу „Мислење“ (Опиниони) на ТВ Клан Албанија и Берат Бужала – директор и главен и одговорен уредник на косовскиот портал „Национале“, беа ВИП-гостите на ДУИ за време на вчерашниот избор на техничката влада.
Порталот „Икс“ , преку сторијата на новинарот Фуркан Салиу, објави дека тие цел ден се превезувале со службено возило од Министерството за политички систем со кое раководи Артан Груби. Според сторијата на „Икс“, тие прво пиеле виски и пушеле цигари во канцеларијата на Али Ахмети, а потоа ги зазеле столчињата во ВИП-ложата во пленараната сала на македонскиот парламент.