Од Владата на Република Северна Македонија велат дека новиот Закон за контрола на опојни дроги ќе го откочи извозот на суровини од канабис произведен во земјава. Во одговор до „360 Степени“ од Владата додаваат дека со законот се регулираат европските и меѓународните препораки во областа на одгледувањето канабис.
„Една од препораките на Меѓународниот борд за контрола на дроги е формирање на Агенција што е вклучено во новиот закон, каде се регулира само медицинската употреба на канабис. Извозот на сув цвет, што е барање на компаниите кои произведуваат медицински канабис, е регулиран со новиот закон“, велат од Владата.
Во одговорот нема детали за новата институција што ќе се основа и на каков начин ќе „се регулираат европските и меѓународните препораки во областа на одгледувањето канабис“.
Повеќе фирми-одгледувачи на канабис за медицински цели, преку Здружението „Макканабис“, бараат власта да им помогне со олеснување на извозот на сув цвет и масло од канабис за медицински цели, за што е неопходно исполнување на европските стандарди за добра производствена пракса. Тоа, пак, значи време и ангажман на странски агенции што чини многу пари.
„360 Степени“ објави дека вкупните приходи на сите 20 лиценцирани фирми од легализацијата на канабисот досега е само 330.000 евра наспроти 3.300.000 евра расходи.
Претседателот на Здружението „Макканабис“, Костадин Дуковски, ја повика Владата да им излезе во пресрет на одгледувачите на канабис.
„Би апелирал Владата малку повеќе да се ангажира во делот на прифаќањето, бидејќи нашето законодавство е усогласено со европското.
-Барате да се признае македонското ГМП (добра производствена пракса) за да можете да извезувате?
Нормално, нормално. Кога ќе видите, ние ги исполнуваме сите услови и во самото решение за ГМП-тоа се вика добра производна пракса, пишува „согласно ЕУ-директивите“. Значи, треба да се направи некое контролно тело или да се ангажира подобра комисија која ќе биде акредитирана од европското законодавство за да можеме да ги имплементираме тие стандарди. Тие за нас се многу недостапни, збориме за една имплементација со ЕУ или Фармакопеја да се усогласиме можеби две години ќе ни требаат. Еве, Реплек конкретно, има оглас пуштено, бара ГМП-услови, никој не ги исполнува тие стандарди моментално во Македонија.
-Зошто е проблем да го исполните?
Тоа се многу сериозни инвестиции, дел од фирмите немаат пари, дел од фирмите да речеме што имаат некоја визија, колку да земат лиценца, ќе ја земат лиценцата и тука настануваат веќе проблемите“, вели Дуковски.
Дел од фирмите производители признаваат дека не го имале предвид европското законодавство во почетниот процес на инвестирање.
Како закочи најавениот „марихуана-бум“ и како тече процесот на одгледување на оваа култура во земјава, погледнете во видео-прилогот на „360 Степени“.