Извршната директорка на Хелсиншкиот комитет за човекови права, Уранија Пировска, вели дека при постапката за избор на членови на КСЗД се направени неколку законски пропусти, посочувајќи го критериумот за потребното искуство во областите човекови права (седум години) и дискриминација (пет години), одредба која, како што рече, очигледно многу широко се толкува затоа што дел од предложените кандидати го немаат тоа искуство
Мрежата за заштита од дискриминација (МЗД) денеска најави дека ќе поднесе претставка до Уставниот суд, бидејќи, како што велат нејзини претставници, пратениците во Собранието не го почитувале законот во изборот на кандидатите за членови на Комисијата за спречување и заштита од дискриминација (КСЗД).
Од МЗД на денешната прес-конференција упатија апел до пратениците кога ќе гласаат за членови на Комисијата за спречување и заштита од дискриминација тоа да го направат непристрасно и во корист на граѓаните, заради кои и постои оваа институција.
Посочија дека не бараат места за претставници на граѓанските организации во Комисијата или, пак, пратениците и политичките партии да им направата услуга и да ги изберат нив, туку бараат фер и транспарентен избор, согласно законот и тоа не за една или две, туку за сите позиции во КСЗД.
Сепак, како што велат од Мрежата за заштита од дискриминација, Собранието со години нема политичка волја да го направи тоа.
Кандидатката за член на КСЗД, Драгана Дрндаревска вели дека нема да го прифати најкраткиот мандат во Комисијата, додавајќи оти смета дека кон неа е сторена политичка дискриминација.
„Одлуката да ми го дадат најкраткиот мандат во Комисијата за спречување и заштита од дискриминација е понижувачка, не само кон мене, туку и кон целиот граѓански сектор и експертите што со години се занимаваат со дискриминацијата. Јавно кажувам дека нема да го прифатам најкраткиот мандат и сметам дека кон мене е сторена политичка дискриминација, бидејќи не сум поврзана со политичка партија, додека на другите кандидати кои се поврзани со политички партии им се дадени подолги мандати. За мене ова значи дека му се спротивставуваме на потценувачкиот однос кон граѓанскиот сектор, кон експертизата и знаењето и нема да дозволиме да мислат дека со тоа што ќе ни дадат мандат од една година и два месеци ќе нѐ замолчат“,
порача Дрндаревска, пренесува МИА.
Со изборот на партиски кадри, вели таа, независноста на Комисијата повторно е ставена под прашање.
Уранија Пировска, извршна директорка на Хелсиншкиот комитет за човекови права, кажа дека според Законот кандидатите треба да имаат седумгодишно работно искуство во областа на борба за човекови права, од кои пет во областа дискриминација.
„Не заборавајте, политичката дискриминација во Македонија е многу присутна и тргнувајќи од тоа не може да се очекува дека лицата што се избрани врз партиска основа ќе можат непристрасно и професионално да одлучуваат токму во тие случаи на политичка дискриминација“,
рече Пировска, која потсети дека од сега владејачката СДСМ најмногу ја критикувале работата на КСЗД кога биле опозиција токму поради изборот на партиски членови.
Таа додаде дека при постапката за избор на членови на КСЗД се направени неколку законски пропусти, посочувајќи го токму критериумот за потребното искуство во областите човекови права (седум години) и дискриминација (пет години), одредба која, како што рече, очигледно многу широко се толкува затоа што дел од предложените кандидати го немаат тоа искуство.
Претседателката на Mакедонското здружение на млади правници, Александра Цветановска, рече дека Законот е погрешно толкуван и оти мандатот не може да биде пренесен ако е истечен како во овој случај.
„Тоа е грешка, што треба да се исправи, затоа што мандатот не може да биде пренесен на друго лице, како што е случајот со Драгана Дрндаревска која е предложена за мандат од една година и два месеци, за разлика од другите кои имаат мандат од пет години, а мандатот е истечен односно времето во кој требаше да биде избрано лице за таа позиција“,
рече Цветановска.
Таа додаде дека меѓу предложените кандидати нема лица со попреченост, иако меѓу пријавените имаше луѓе кои имаат попреченост, а кои имаат големо искуство во оваа област, а Комисијата, според Законот, како тело треба да ги одрази различностите во општеството.
Кандидатите за членови во Комисијата од граѓанскиот сектор Елена Кочовска, Давид Тасевски и Маја Атанасова кажаа дека „со ваквиот избор, државата покажува дека не сака да има функционални институции и не сака луѓе кои, и покрај својата различност, можат многу да придонесат во развојот на државата“.
Тие велат и дека „не сакаат да дозволат Комисијата која треба да им служи на најранливите граѓани во државата да стане жртва на партиското вработување“.
Собраниската Комисија за прашања на изборите и именувањата на седница пред два дена (21 декември) ја утврди предлог-листата за избор на членови на Комисијата за спречување и заштита од дискриминација.
Петгодишен мандат како нови членови на КСЗД од собраниската Комисија добија кандидатите Флора Кадриу – дипломиран професор по одделенска настава од Скопје, Душан Томшиќ – дипломиран социјален работник од Скопје и Зекир Абдулов – дипломиран правник од Делчево. Драгана Дрндаревска, дипломиран правник од Скопје, доби поддршка од членовите на Комисијата за мандат од една година и два месеци и осум дена.
На конкурсот беа пријавени 25 кандидати, меѓу кои и актуелните членови на Комисијата, Исмаил Камбери и Весна Бендевска.