Централното претседателство на ДУИ денеска одлучи Талат Џафери да биде премиер на техничката влада 100 дена пред парламентарните избори во 2024 година
Опозициската ВМРО-ДПМНЕ реагира на одлуката на ДУИ, Талат Џафери да биде премиер на техничката влада 100 дена пред парламентарните избори во 2024 година, нагласувајќи дека „дезертерот Ковачевски ќе биде заменет со нов дезертер“.
„СДСМ забега со штетите кои ги предизвикува за Македонија. Ковачевски дезертирал од Армијата, правејќи се болен, само за да не ја отслужи својата обврска, исто како и неговиот наследник на местото технички премиер Талат Џафери, кој 2001 година од Армијата преминува во УЧК. Сега јасно е зошто Ковачевски не се откажуваше од техничка влада. Дезертерот Ковачевски ќе биде заменет со нов дезертер Џафери“,
се наведува во соопштението на ВМРО-ДПМНЕ.
Оттаму додаваат дека „деспотот од Форино ќе остане запаметен по неговите кршења на законот и процедурите и незаконскиот начин на кој беше поставен на тоа место“.
„Тој одбиваше иницијативи за референдум ставајќи се во улога на врховен и уставен судија, потоа редеше европски знаменциња на сите штетни закони со кои оваа власт на ДУИ и СДС го крадеа народот и државата. Исто така Талат Џафери ќе остане запаметен и по неуставното и незаконското донесување на законот за јазиците и редица други системски закони“,
додаваат од најголемата опозициска партија.
Централното претседателство на ДУИ денеска одлучи Талат Џафери да биде премиер на техничката влада 100 дена пред парламентарните избори во 2024 година. Веста на својот фејсбук-профил ја објави портпаролот на партијата и министер за надворешни работи Бујар Османи.
Тој додаде и дека Фатмир Бесими е избран за шеф на Централниот изборен штаб за изборите 2024.
„Се овластува претседателот на партијата да продолжи со разговорите со политичките партии и да одлучува за евентуални коалиции за претседателските и парламентарните избори“,
напиша Османи на Фејсбук.