Резолуцијата уследи по четири неуспешни обиди за гласање во Советот за безбедност на Обединетите нации во врска со тековниот конфликт меѓу Израел и Хамас од 7 октомври
Советот за безбедност на Обединетите нации (ОН) ја усвои нацрт-резолуција со која се повикува на продолжени хуманитарни паузи во борбите меѓу Израел и Хамас во Појасот Газа за „доволен број денови“ за да се овозможи пристап до хуманитарна помош.
Резолуцијата иницирана од Малта ја поддржаа 12 земји, додека САД, Велика Британија и Русија беа воздржани.
Покрај повикот за хуманитарни паузи, резолуцијата, исто така, повикува на ослободување на сите заложници, особено децата, кои ги држи милитантната група Хамас.
Со резолуцијата се бара почитување на меѓународното право, особено заштита на цивилите и на децата и ги повикува сите страни да не ги лишуваат цивилите во Газа од хуманитарната помош потребна за нивниот опстанок. Дополнително, се нагласува важноста на механизмите за координација и бара заштита на целиот медицински и хуманитарен персонал, но и на амбулантните возила и инфраструктура, вклучително и на објектите на ОН.
Резолуцијата уследи по четири неуспешни обиди за гласање во Советот за безбедност на Обединетите нации во врска со тековниот конфликт меѓу Израел и Хамас од 7 октомври.