Јовески во писмото ги објаснува целата постапка и дејствијата што ги презело Јавното обвинителство
Јавниот обвинител Љубомир Јовески достави писмо до претседателот на Собранието Талат Џафери по поднесената интерпелација од дел од пратениците од опозицискиот албански блок, во кое ја објаснува целата постапка за судскиот предмет за пожарот во тетовската модуларна болница во кој на 8 септември 2021 година загинаа 14 лица.
Вели дека за овој трагичен настан јавноста во континуитет се известувала без да се наруши текот на постапката, која во еден дел веќе завршила со осудителна пресуда.
Од кабинетот на претседателот на Собранието Талат Џафери денеска информираа дека одговорот на Јовески пристигнал до законодавниот дом во рокот даден во Деловникот, односно вчера попладне по пошта, така што тој денеска се дистрибуира до пратениците, а интерпелацијата ќе се најде на дневен ред на првата наредна нова седница.
Јовески во писмото ги објаснува целата постапка и дејствијата што ги презело Јавното обвинителство.
„По спроведена претходна постапка, во рамките на која беа преземени многу истражни дејствија, имајќи ја предвид пред сè тежината и комплексноста на настанот, Основното јавно обвинителство Тетово поднесе обвинение против три лица, од кои двајца директори на болницата се товарат дека ‘иако биле должни да имаат соодветни уреди и инсталации за заштита од пожари и експлозии, друга противпожарна опрема, средства за гаснење на пожари и противпожарни апарати, на денот на пуштање во употреба на модуларната болница во Тетово, па сè до денот на настанување на пожарот во модуларната болница, не поставиле соодветни уреди за заштита од пожар’ со што сториле дело – ТЕШКИ ДЕЛА ПРОТИВ ОПШТАТА СИГУРНОСТ по чл. 292 ст. 4 в.в. со чл. 288 ст. 4 в.в. со ст. 2 од Кривичниот законик, додека третиот обвинет ‘како одговорно лице дозволил влез на неовластени лица членови на семејствата на болните од ковид-19, како придружници, во модуларната болница и се товареше за кривично дело – НЕПОСТАПУВАЊЕ СПОРЕД ЗДРАВСТВЕНИТЕ ПРОПИСИ ЗА ВРЕМЕ НА ЕПИДЕМИЈА по чл. 206 ст. 1 од Кривичниот законик. Обвинението го опфаќаше и правното лице Клиничка болница Тетово. Обвинението се темели на обезбедените докази и извршени вештачења, кои вклучуваат – вешт наод на Одделот за криминалистичко-технички испитувања и вештачења при Министерството за внатрешни работи, службена експертиза од Форензичкиот институт при Сојузната криминалистичка служба и лабораторија од Германија, вешт наод на стручно лице електроинженер, вештачењето на – Технолошко-металуршкиот факултет кој ја испитуваше брзината на согорување на сите материјали употребени за болницата, како и вештачење на Електротехничкиот факултет – Скопје во поглед на усогласеноста на изведената инсталација со законските прописи за ваков тип градби. Сите овие докази и вештачења се комплементарни, не се спротивставуваат и јасно ја утврдуваат причината за настанување на пожарот, но и одговорноста на службените лица.
По вака поднесеното обвинение, врз основа на сите презентирани докази, Основниот суд во Тетово донесе осудителна пресуда за двајцата директори, изрекувајќи условна осуда, додека за третиот обвинет е донесена ослободителна пресуда. Основното јавно обвинителство Тетово ја обжали пресудата и по основа на одредената санкција за двајцата обвинети и по основа на ослободителната пресуда за еден од обвинетите. Свои жалби вложија и осудените. Во тек е жалбена постапка. За тендерот за набавка на сите модуларни болници, во Основното јавно обвинителство за гонење на организиран криминал и корупција се води уште еден предмет, кој е во предистражна постапка и во кој интензивно се преземаат дејствија на проверки“,
објаснува Јовески во писмото.
Поднесената интерпелација поставува три прашања, на кои Јовески во писмото им одговара на пратениците.
Вели дека најодговорно изјавува дека никогаш во ниту еден момент во текот на оваа постапка немало обид за влијание и притисоци.
„Затоа, на крајот, како државен јавен обвинител, би сакал преку овој одговор да се обратам и до сите вас пратеници во Собранието на Република Северна Македонија и да побарам со своето општествено и политичко влијание да поттикнете создавање клима во која јавните обвинители ќе можат непристрасно одговорно да ја извршуваат својата должност. И јавнообвинителската работа, па и работата на другите правосудни органи, е јавна и постојано оценувана од повеќе домашни и странски фактори, меѓутоа таа не смее да биде злоупотребувана за политички калкулации и пресметки“,
посочува обвинителот.
Група пратеници од албанскиот опозициски блок во Собранието денеска го обвинија претседателот на Собранието Талат Џафери дека го штити јавниот обвинител Љубомир Јовески, зашто на дневен ред не ја става поднесената интерпелација.
Албанската опозиција поднесе интерпелација за работата на Јовески, ВМРО-ДПМНЕ најави поддршка
Подносители на интерпелацијата се пратеници од Алтернатива, Беса и партијата Демократско движење, а причина за оваа интерпелација е нивното основано сомнение дека, како што велат, тој имал улога во поинакво насочување на судскиот процес што се водел во врска со пожарот на модуларната болница во Тетово, при што загинаа 14 пациенти.