По измените на Кривичниот законик што Собранието ги донесе во февруари годинава, напад на новинари и медиумски работници се гони како напад на службено лице. Конкретниот случај, како што потврдија од Јавното обвинителство, е прв по кој се постапува согласно измените
Основно јавно обвинителство во Кавадарци денеска поднесе обвинение против 43-годишен жител на Росоман кој кон средината јули спречил новинарски екипи да си ја вршат работата, соопшти денеска Јавното обвинителство.
Тој, информираат од оттаму, се товари за кривичното дело спречување службено лице во вршење службено дејствие по член 382 став 3 од Кривичниот законик.
По измените на Кривичниот законик што Собранието ги донесе во февруари годинава, напад на новинар(и) се гони како напад на службено лице. Конкретниот случај, како што потврдија од Јавното обвинителство, е прв по кој се постапува согласно измените.
Инаку, според краткиот опис на настанот наведен во соопштението, обвинетиот на 18 јули годинава на регионалниот пат Градско-Прилеп во близина на Росоман спречил новинари и сниматели да снимаат прилог за сообраќајна несреќа.
„Тој најпрвин со агресивен тон и навреди се обратил кон снимател на ТВ 24 и кон новинар на МРТ, а потоа со ногата удрил во сталакот на една камера и ја оштетил. На овој начин новинарите биле спречени во нивната работа и го прекинале снимањето“,
се наведува во соопштението на Јавното обвинителство.
Измените на Кривичниот законик, со кој нападот на новинар се третира како напад на службено лице, беа изгласани од Собранието на 13 февруари годинава. Иако најавите за вакви промени во КЗ се најавува од претходно, новинарите и медиумските работници чекаа неколку години додека тие да се најдат на пленарна седница во парламентот и да бидат донесени.
Покрај медиумските работници, со измените беа опфатени и адвокатите и здравствените работници кон кои нападите и заканите исто така се третираат како напади врз службени лица. Демнењето и половото вознемирување со овие измени, исто така, станаа кривични дела.
Според овие измени на КЗ, за закани по живот кон медиумски работници, адвокати и здравствени работници, напаѓачите ќе одговараат со парична казна или со затворска казна до 6 месеци. А, доколку заканата предизвика чувство на страв или несигурност, казната може да достигне и до една година затвор. Во случај да е сторено насилство врз овие лица, тогаш е предвидена казна од од три месеци до три години.
„Со казната на овој член ќе се казни тој што делото ќе го стори спрема службено лице во вршењето на службата, адвокат, лекар или друг здравствен работник, новинар или друг медиумски работник или друго лице што врши работи од јавен интерес при вршењето на професионалните задачи или во врска со вршењето на професионалните задачи кои ги презема во рамките на своите овластувања или спрема повеќе лица“,
пишува во измените на Кривичниот законик.