По укажувањето на Судскиот совет оти не го известува за своето отсуство од седниците, Кренар Лога во писмена реакција вели дека присуството на седници на министерот за правда, кој како член по функција е без право на глас во Судскиот совет, не влијае на носењето на одлуките и законското работење на институцијата
Иако уредно поканети, министерот за правда Кренар Лога и претседателката на Врховниот суд, Беса Адеми, кои се членови по функција во Судскиот совет, веќе подолго време не присуствуваат на седниците и не го известуваат Советот за своето отсуство од истите. Ова на денешната седница го констатираа членовите на Судскиот совет.
Присуството на членовите по функција на седниците, како што посочи претседателот на Советот, Сашко Георгиев, може да биде од особено значење за разгледување и изнаоѓање решенија за состојбата во правосудството.
По дебатата како би се констатирала оправданоста или неоправданоста на отсуството од седниците на членовите по функција, доколку и во иднина продолжи ваквата пракса, Судскиот совет одлучи дека во иднина е доволно само да се констатира дека тие не го известиле Советот за нивното отсуство, без да се навлегува дали е тоа оправдано или неоправдано.
Лога: Присуството на седници, без право на глас, не влијае на работата на Судскиот совет
По укажувањето на Судскиот совет оти не го известува за своето отсуство од седниците, Кренар Лога во писмена реакција вели дека присуството на седници на министерот за правда, кој како член по функција е без право на глас во Судскиот совет, не влијае на носењето на одлуките и законското работење на институцијата.
„Веднаш по стапувањето на функцијата министер го известив Судскиот совет и побарав да се почитува препораката на ГРЕКО и да се интервенира во Уставот со бришење на оваа одредба, во спротивно најавив дека ќе присуствувам на сите седници на Судскиот совет на кои имам право како член по функција затоа што Уставот мора да се почитува“,
вели Лога во писменото соопштение.
Додава дека со писмен допис го информирал Советот да направи разграничување на седниците и да го информира на оние на коишто може да присуствува, посочувајќи дека според закон, членовите на Советот по функција не учествуваат во работата на седниците на кои се расправа и одлучува за поведена постапка за утврдување на одговорност, избор или разрешување на судија или претседател на суд
Министерот додава дека, како и неговите претходници, одлучил да не присуствува на седниците на Судскиот совет, особено по превирањата во ова тело по низата скандали и превирања во последните неколку месеци.