Првичните проценки на висината на предизвиканите штети се дека таа ќе надмине половина милијарда евра, изјави словенечкиот премиер по денешниот состанок на државниот врв. Тој посочи дека две третини од територијата на Словенија се погодени од поплавите, а напорите повторно да се овозможи нормален живот ќе бидат големи
Словенија се справува со последиците од силното невреме кое ја погоди земјата ноќта меѓу четвртокот и петокот. Ситуацијата со невремето и поплавите што ги предизвика, словенечкиот премиер Роберт Голоб ја оцени како „најтешката природна катастрофа во поновата историја“ на земјата.
Обилни врнежи, како што пренесуваат медиумите, имало и ноќеска во словенечките покраини Горењска и Корушка, кои предизвикале нови поплави во тие области. Водостоите на југот на Словенија, кои наместа се излеаја, се во пораст, а многу патишта се сè уште затворени.
„Словенија се соочува со најтешката природна катастрофа во поновата историја. Штетата ќе надмине 500 милиони евра“,
изјави словенечкиот премиер, пренесува регионалниот сервис на Радио Слободна Европа.
Тој посочи дека две третини од територијата на Словенија се погодени од поплавите, а напорите повторно да се овозможи нормален живот ќе бидат големи.
Говорејќи за првата проценка на штетите, која е над половина милијарда евра, словенечкиот премиер најавил дека веќе се подготвуваат законски измени за справување со ситуацијата.
Во поплавите што ги предизвика невремето во Словенија, оштетени се главно патната и енергетската инфраструкра, како и стотици станбени згради.
Според податоците на словенечката агенција за животна средина, од денеска се очекува врнежите во земјата постелено да се намалуваат.
Сепак, областа Чрна во Корушка е сè уште отсечена од светот бидејќи многу мостови и патишта се оштетени, струјата и водата се исклучени, а не функционираат ниту телефонските врски. За помош на населението во областа и понатаму се ангажирани војската и пожарникарите. Најголем приориотет е испораката на цистерни со вода за пиење, бидејќи водоснабдителниот систем во областа е целосно оштетен, ги пренесува „Индекс“ информациите на хрватските и словенечките агенции.
Невремето во Словенија однесе и три човечки животи. Како што соопштија вчера словенечките власти, а пренесе агенцијата СТА (СТА), во поплавите загина еден словенечки државјанин во Камник, а двајца холандски државјани настрадаа во планините кај Крањ.
Невремето од Словенија продолжи да се движи кон исток и вчера вечерта пристигна во Хрватска, поради што во Риека и Госпиќ беше вклучен црвен, додека за Загреб, Карловац и Сплит портокалов метеоаларм.
Дел од медиумите вчера јавија дека поради обилните врнежи, реката Сава се излеала од коритото во Загреб. Врнежите започнале околу 14 часот, по што се смириле, но водостојот на реката се зголемил, поради што дошло до поплавите.