Ангелов истакна дека добро оди раната детекција и релативно брзо се дознава за сите пожари
Трите ертрактори се во исправна состојба и подготвени за дејствување во случај на големи пожари, истакнаа директорот на Центарот за управа со кризи (ЦУК), Стојанче Ангелов, и директорот на Дирекцијата за заштита и справување (ДЗС), Беким Максути, на денешната заедничка прес-конференција.
„ЦУК, после подолго време, последните две и пол години има извонредна соработка со Дирекцијата за заштита со која се трудиме да овозможиме граѓаните да бидат максимално заштитени“,
изјави Ангелов.
Тој истакна дека благодарение на соработката на ЦУК и ДЗС со Министерството за внатрешни работи и Армијата, тие моментално располагаат со два хеликоптери од МВР, од кои едниот е со ведро од еден тон, а другиот со значително поголемо ведро од три тона, како и два хеликоптери од Армијата кои ги чуваат како посебна линија на одбраната.
„Исто така имаме и извонредна соработка со Локалната самоуправа, со Територијалните противпожарни единици со коишто на терен секогаш наидуваме на разбирање, што значително ја олеснува координацијата при појава на шумски пожари или пожар на отворено, како и со градоначалниците и пожарникарите од Национални шуми“,
додаде Ангелов.
Тој посочи дека добро оди раната детекција и релативно брзо се дознаваат сите пожари.
На прашањето сега откако се добиени противпожарните авиони, дали има можност за активирање на сензорни механизми за гасење на пожарите како што е примерот со Германија и неколку други држави, Максути рече дека се работи на тоа заеднички преку граничен проект со Албанија, каде што покрај Општините Струга и Либражд, којшто покрај тоа што го покрива Националниот парк на планината Јабланица, таму се веќе поставени и сензори и камери.
„Влегуваме во втората, односно завршната фаза на проектот, активни се, даваат исклучителни резултати. Ние сме отишле чекор понапред со тоа што ги споделуваме податоците со Министерството за внатрешни работи, значи сѐ што добиваме како слики или како видеозаписи или, пак, други сигнали, ги споделуваме со МВР со цел спречување на сеча, но и какви било други влијанија коишто можат да се случат во тој регион“,
рече Максути.
Директорот на ДЗС, Максути, истакна дека согласно Законот за заштита и спасување секое лице во државата е должно да биде дел од системот за заштита и спасување и укажа дека што и да се случува на терен, посебно во летните периоди кога температурите се енормно високи и кога опасноста од пожарите е поголема, секој граѓанин е должен да преземе мерки и да дејствува со цел навремено гаснење на пожарите.
„Сакаме да укажеме дека авионите и хеликоптерите се последната алатка со којашто треба да дејствуваме во случај на пожар“,
истакна Максути.
Тој нагласи дека од досегашната пракса може да се согледа дека градоначалниците пред што било да потрошат од своите ресурси, каква било друга помош да побара од другите соседни општини, бара директно вклучување на авион, односно хеликоптер дали преку ЦУК, МВР или ДЗС.
„Треба да се каже дека во однос на Законот, прв којшто треба да дејствува на терен, во зависност од тоа каде се појавил пожарот се просторните сили на општината, наменските служби, вработените и интервентните служби на сопственикот. Во случај на поголем настан треба да се вклучат пожарникарите, Итната медицинска помош и МВР“,
додаде Максути.
Директорот на ДЗС потенцира дека силите и средствата на Локална самоуправа, во кои спаѓаат јавните претпријатија, установи, служби, волонтери и просторните сили на Дирекцијата за заштита и спасување, потоа Државните сили и средства, тимовите за брз одговор на ДЗС и Републичките сили имаат надлежност заедно со градоначалниците на тие општини каде што има настан, да дејствуваат во координација со ЦУК за спречување на пожарите.
„И на крајот, нормално, ако сето ова не е доволно за справување со истиот настан, тогаш се преминува и на помош од надвор“,
истакна тој и додаде дека ваков посериозен случај имале во 2021 година кога го активирале механизмот за помош на Европската Унија.