„Стоп, доста беше со манипулации“, „Штука нема да отстапи ниту педа земја за убијците“, „Секирник, село кое е поим за чиста и плодна земја“, беа дел од транспарентите кои ги носеа собраните граѓани на протестот во Струмица
Граѓаните, во организизација на Еколошкото здружение „Здрава котлина“ – Струмица и Еколошкото здружение „Еко долина“ – Ново Село, се собраа на денешниот протест за да кажат „не“ за споената концесија за рудникот Иловица-Штука.
Се бара од државните институции да спречат отворање на рудникот за експлоатација на минерална суровина, руди на бакар и злато на локалитет во Иловица.
„Оваа реакција следува по шокантното спојување на двете концесии за рудникот Иловица-Штука од страна на Владата, која без никаква правна основа одлучи да им ги ресетира и продолжи роковите за спојување, како и да прикаже дека концесионерите и досега ги почитувале законите на Република Македонија. А напротив, концесионерите од ‘Еуромакс рисорсис’ го имаа прекршено Законот за минерални суровини по повеќе основи, поради што Владата во 2019 година им ја одзеде едната концесија за експлоатација, додека за втората концесија немаа ни побарано дозвола за експлоатација. Имено, законскиот максимален рок од 4 години за добивање дозвола за експлоатација, сметано од денот на склучување на договор за концесија, беше истечен и за двете концесии – за едната концесија во јули 2016, а за другата концесија во јануари 2020. Првата концесија беше одземена токму поради неисполнување на дури 7 од 9 неопходни услови за валидно барање за експлоатација!“,
се вели во повикот на еколошките здруженија кои го органзираат протестот.
На собирот во Струмица се појавија и министерките за животна средина и труд и социјала, Каја Шукова и Јована Тренчевска. Шукова вчера најави дека ќе го поддржи протестот.
„Јас ја разбирам загриженоста на граѓаните. Ако можам денеска да го изразам мојот личен став, јас сум исто така против нови рудници во државата. Сметам дека особено тој земјоделски крај, каде што треба да се развива земјоделството и каде што државата ги поддржува земјоделците, мислам дека тоа треба да ни биде приоритет, тоа е мој личен став“, изјави вчера Шукова.