На состанокот, како што информираат од Општина Битола, договорено е општинската администрација да ги контактира претседателите на урбаните и месните заедници за да може да се добијат точни податоци за нанесени штети во сите делови на општината и соодветно на тоа, доколку е потребно да се преземат дополнителни мерки
Битолчани, кои имаат штети по невремето што попладнево го зафати градот, може да ги пријавуваат на телефонскиот број 112 на Центарот за управување со кризи, а Комисијата за проценки дополнително ќе ја утврди состојбата. Ова е одлучено на попладневниот итен состанок на штабот за заштита и спасување, кој беше свикан на барање на градоначалникот на Битола, Тони Коњановски.
На состанокот, како што информираат од Општина Битола, е договорено општинската администрација да ги контактира претседателите на урбаните и месните заедници за да може да се добијат точни податоци за нанесени штети во сите делови на општината и соодветно на тоа, доколку е потребно да се преземат дополнителни мерки.
Штети од невремето се регистрирани во повеќе делови од градот, како и на патниот правец кон Општина Могила.
„Удар од гром има на улицата ‘Караорман’ број 104 в, поплавени визбени простории на улицата ‘Ѓорче Петров’, на броевите 21 и 39, поплавени куќи на ‘Дебарска’ бр 99, ‘Струшка’ број 33, ‘Димитар Мите Богоевски’ број 6, одрон на патниот правец А3 кај тунелот, како и паднати дрвја на патниот правец Беранци – Вашерејца – општина Могила“,
се наведува во соопштението од Општина Битола.
Оттаму додаваат дека јавните претпријатија со своите човечки ресурси и механизација, на терен веќе работат на отстранување на штетите предизвикани од обилните врнежи од дожд.
„Комуналното јавно претпријатие ‘Нискоградба’, согласно заклучоците од денешниот состанок има обврска да изготви динамички план со технички решенија за отстранување на поголемите проблеми на одредени локации, каде истите се констатирани“,
се додава во соопштението.
Пороен дожд попладнево поплави делови од градот Битола. Невремето предизвика прекин на сообраќајот на повеќе улици, а има и поплавени домови и визби. Информацијата за проблемите со поројниот дожд на својот фејсбук-профил ја објави градоначалникот на Битола, Тони Коњановски.
По објавата на градоначалникот, битолчани на неговиот профил споделуваат видеа и фотографии од поплавените делови во градот и штетите кои ги има предизвикано, но оставаат и коментари во кои се вели дека шахтите по улиците се преполни со ѓубре и дека им треба чистење за да не доаѓа до вакви поплави.
Според информациите од Управата за хидрометеоролошки работи (УХМР), од дождовните места на УХМР, попладнево во Битола има наврнато 48 литри на квадратен метар, но оттаму додаваат дека поради локалноста на процесите, паднатата количина воден талог многу варира и на различни места може да е многу поголема од измерената.
Битолскиот портал „Бабам Битола“ на својата фејсбук-страница објави видеа на кои се гледа дека улиците во градот се целосно под вода.