Наместо тоа, сведоци сме на секојдневни криминални афери, високо ниво на корупција и заробено правосудство за што потврда доаѓа од релевантни меѓународни институции, но и од земји стратешки партнери на Македонија, кажал лидерот на опозицијата за време на средбата со европскиот амбасадор во земјава
Власта ниту има капацитет ниту има желба да ги спроведе реформите што се важни за земјава. Ова денеска го кажал лидерот на опозициската ВМРО-ДПМНЕ, Христијан Мицкоски, за време на средбата која ја остварил со евроамбасадорот во земјава Дејвид Гир.
Мицкоски и Гир разговарале за реформите кои земјава треба да ги спроведе, а кои се важни за нејзиниот пат кон Европската Унија, а тема на разговор била и актуелната политичка состојба во земјава.
„Власта ниту има капацитет, а ниту има желба да ги спроведе реформите. Наместо тоа сведоци сме на секојдневни криминални афери, високо ниво на корупција и заробено правосудство за што потврда доаѓа од релевантни меѓународни институции, но и од земји стратешки партнери на Македонија“,
изјавил Мицкоски.
Лидерот на опозициската партија кажал дека земјава предолго време е во безизлезна состојба во која, како што обвини, ја довела власта и затоа повика предвремени парламентарни избори.