Анализата покажала дека од вредноста на вкупно направените трансакции од странци кон македонски е-трговци, 49 отсто припаѓаат на иматели на платежни картички од САД, Обединетото кралство, Швајцарија, Бугарија, Турција, Шведска и Косово
Пораст од 33 отсто бележи купувањето производи и услуги од македонски е-трговци од страна на странски иматели на платежни картички. Минатата година, според анализата на Асоцијацијата за е-трговија на Македонија (АЕТМ), странците потрошиле 21,76 милиони евра за купување производи од македонски е-трговци. Тоа, според анализата на АЕТМ, која се повикува на податоци од Народната банка на Република Северна Македонија, е пораст за 33 отсто во однос на 2021 година, додека вредноста на е-трансакциите од странство кон македонски е-продавници е зголемена за над 10 пати во однос на 2016 година.
„Остварената вредност странските онлајн купувачи ја направиле во 618 932 трансакции или просечно потрошиле 35,2 евра по трансакција. Направената анализа за движењето на бројот и вредноста на направените онлајн трансакции од странци кон домашни е-трговци од 2016 година до 2022 година покажува дека има значаен пораст. Ако во 2016 година странците потрошиле онлајн кон македонските е-трговци само два милиони евра во 32,9 илјади трансакции, во 2022 вредноста е зголемена за над 10 пати, додека бројот на трансакциите за скоро 19 пати. Што се однесува до учеството на странците во вкупно остварената вредност на онлајн трансакциите и кон дома и кон странство од домашни и странски платежни картички тоа се зголемува од 2,2 отсто во 2016 на речиси четири проценти во 2022 година“,
велат од АЕТМ.
Анализата покажала дека од вредноста на вкупно направените трансакции од странци кон македонски е-трговци, 49 отсто припаѓаат на иматели на платежни картички од седум земји.
„Од иматели на платежни картички издадени во САД, потрошени се 3,6 милиони евра или 17 отсто од вредноста на трансакциите. Потоа 2,2 милиони евра или 10 отсто од Обединетото кралство и 1,7 милиони евра или осум проценти од Швајцарија. Потоа следат германските иматели на картички кои направиле четири отсто, Бугарија и Турција три проценти, и Шведска и Косово два отсто од вредноста на онлајн трансакциите“,
известуваат од АЕТМ.
Понатамошната анализа на АЕТМ на бројот и вредноста на направените трансакции од странство кон македонските е-трговци е направена подетално за земјите кои остваруваат 49 отсто од вкупно направената вредност. Најголем пораст на бројот како и на вредноста на направените онлајн трансакции од странски иматели на платежни картички во 2022 година во однос на претходната година е остварен од Швајцарија, додека највисока просечна трансакција е направена од Косово.
„Е-трговијата овозможува купување на производи и услуги од кој било крај на светот. Од анализата се гледа дека најмногу онлајн трансакции направени од странски иматели на платежни картички како по број така и по вредност се направени од земји каде што има македонски иселеници или од соседните земји. Тоа нè упатува на претпоставка која е основа за понатамошно истражување дека нашите иселеници се повеќе го користат овој канал за купување на производи и услуги на своите блиски од македонските е-продавници. Очекувањата се и понатаму да продолжи растот на вредноста и бројот на реализирани онлајн трансакции од странство односно најмногу од Македонци иматели на странски платежни картички кон македонски е-трговци. Секој пораст на е-трансакциите е важен за развојот на македонската е-трговија“,
вели претседателката на Асоцијацијата за е-трговија на Македонија, Нина Ангеловска.