Зимскиот ресорт на Царев врв, вели министерот Николовски, е мегапроект кој ќе се вброи како еден од петте најголеми ски-центри во регионот. За реализацијата на овој проект, министерот денеска потпиша меморандум за соработка со пет градоначалници
Изградбата на ски-центар и зимски ресорт на Царев врв на Осоговските Планини станува реалност, уверуваат од Министерството за земјоделство, шумарство и водостопанство (МЗШВ).
Оттаму велат дека започнува реализацијата на овој значаен проект, а за таа цел денеска министерот Љупчо Николовски со градоначалниците од источниот и од североисточниот дел потпишал меморандум за заедничка соработка на проектот насловен „Изградба на ски-центар на Царев Врв и развој на ски-туризам на Осоговските Планини“.
Првиот чекор кон реализацијата на проектот, велат, е да се обезбедат солидни информации за да се изработи урбанистички мастер план за изградба на ски-центарот и на зимскиот ресорт.
„Мастер планот би опфатил ажурирање и дополнување на постојната физибилити студија за ски-центар ‘Царев црв’ со подготовка на идеен проект, геодетски работи за обезбедување на максимален квалитет на подлогите за проектирање и висока точност при пренесувањето на проектираната состојба на терен, ревизија и урбанистичко планирање со стратегиска оцена за влијанието на животната средина“,
велат МЗШВ.
Изработката на потребната документација, уверуваат од кабинетот на Николовски, е од највисок јавен интерес со оглед дека овој проект се става на листата национални стратешки приоритети.
„Овој ресорт е капитален проект кој ќе донесе развој на туризмот, развој на економијата и бизнисот од истокот и североистокот. Зимскиот ресорт ‘Царев врв’ ќе придонесе за развојот на зимските спортови, ова е мегапроект кој ќе се вброи како еден од петте најголеми ски-центри во регионот. Преку овој проект ја ставаме Република Северна Македонија во светските туристички карти како земја со најдобри атрибути за посета и рекреација“,
вели министерот Николовски.
Меморандумот за соработка со министерот го потпишаа градоначалници на пет општини: Пробиштип (Драган Анастасов); Крива Паланка (Сашко Митовски); Кочани (Љупчо Папазов); Македонска Каменица (Димчо Атанасовски) и Кратово (Тодорче Николовски). Дел од меморандумот за соработка се и Центарот за развој на Источниот плански регион и Центарот за развој на Североисточниот плански регион.