Американскиот државен секретар Ентони Блинкен имаше „искрен, суштински и конструктивен“ разговор со кинескиот министер за надворешни работи Чин Ганг во Пекинг, соопшти американскиот Стејт департмент.
Државниот секретар ја нагласи важноста на дипломатијата и одржувањето отворени канали на комуникација низ спектарот на прашања за да се намали ризикот од погрешно толкување и погрешно проценување, истакна портпаролот на Стејт департментот, Метју Милер.
Блинкен го поканил Чин да го посети Вашингтон за да продолжат со разговорите.
Додека, кинеските медиуми објавија дека Чин истакнал дека Пекинг е посветен на изградба на стабилен, предвидлив и конструктивен однос со САД.
Чин како најголем ризик за кинеско-американските односи го посочи Тајван, што за Пекинг е дел од Кина.
Посетата на Блинкен на Кина доаѓа речиси пет месеци откако претходната посета на Блинкен беше одложена, по летот на осомничен кинески шпионски балон во воздушниот простор на САД.
САД ги намалија очекувањата за патувањето и двете страни јасно ставија до знаење дека не очекуваат некој голем напредок, пренесе Би-би-си.
Кина организира воени вежби во близина на Тајван, кој Пекинг го смета за составен дел на Кина. САД одржуваат блиски врски со демократски избраната влада на Тајван.
Агендата за посетата на Блинкен покрај средба со кинескиот министер за надворешни работи Чин Ганг вклучува и средба со високиот кинески претставник за надворешна политика Ванг Ји.