Барањето за поведување дисциплинска постапка против Ристовски беше поднесено од Димевски на 17 март, две недели по гостување на ракометниот голман како претставник на политичка партија во ТВ емисијата „ЗА или ПРОТИВ“
Македонскиот олимписки комитет (МОК) денеска му изрече „забрана на вршење работа во олимпискиот спорт“ во траење од четири години на голманот на ракометниот првак Вардар 1961, Борко Ристовски.
Поранешниот македонски репрезентативец е суспендиран поради „изнесување груби лаги, клевети, невистини и ширење неточни информации на адреса на претседателот на МОК, Даниел Димевски“, соопштија од МОК.
Барањето за поведување дисциплинска постапка против Ристовски беше поднесено од Димевски на 17 март, две недели по гостување на ракометниот голман како претставник на политичка партија во ТВ емисијата „ЗА или ПРОТИВ“.
Според МОК, Ристовски „прекршил повеќе членови на Статутот и Дисциплинскиот правилник на МОК, како и законите на државата, со што се нарушува директно угледот на целата спортска фела и спортски организации во јавноста“.
Ристовски најави дека своите ставови ќе ги изнесе на прес-конференција.