Како резултат на овие активности, во кругот на Затвореното одделение е детектирано потенцијалното место од каде што би можело осудените лица да ги реализираат ваквите планови и таму беше дополнително зајакнато обезбедувањето, велат од Управата
Два месеци траеле активностите за спречување на евентуалното организирано бегство од КПД „Идризово“, информираат од Управата за извршување на санкциите, откако Министерството за внатрешни работи (МВР) излезе официјално со детали за ископаниот тунел во најголемиот затвор во државава.
„Управата за извршување на санкциите во координација со КПД ‘Идризово’ и со безбедносните органи, а врз основа на прибрани информации за безбедносната состојба во КПД ‘Идризово’, кои информации индицираа основано сомнение дека од страна на осудени лица се преземаат недозволени активности со кои би се создале услови за организирано бегство од установата, во изминатиот период од два месеци го подигна степенот на безбедност со цел да се дојде до подетални информации и да се провери нивната веродостојност. Како резултат на овие активности, во кругот на Затвореното одделение е детектирано потенцијалното место од каде би можело осудените лица да ги реализираат ваквите планови и таму беше дополнително зајакнато обезбедувањето“,
велат од Управата.
Од причина што се работи за стари објекти од тврда градба кои се вон употреба, додаваат оттаму, по спроведена постапка за јавна набавка била фирма со соодветна дејност за рушење на наведените објекти.
„Откако е постигната согласност со Министерството за внатрешни работи со свои сили да обезбеди асистенција при реализацијата, денеска, на ден 21.03.2023 година во 07:00 часот е пристапено кон рушење на детектираните објекти. Воедно се направени и повеќе ископи во кругот на одделението при што е пронајден подземен недовршен тунел во должина од околу 50-ина метри на потегот од објектите кои се рушат кон оградниот ѕид. По завршените планирани активности и реализираното рушење, во попладневните часови се на терен надлежните органи кои треба да ги истражат сите околности, со цел да се утврдат сите факти до целосно расчистување на сите работи“,
соопштија од Управата за извршување санкции.
Министерството за внатрешни работи попладнево излезе официјално со детали за тунелот во најголемиот затвор во државава, преку кој, како што се наведува, најмалку осуммина затвореници осудени на високи затворски казни планирале организирано бегство.
Тунелот бил откриен откако МВР добило криминалистички сознанија за планот за бегство на затворениците преку тунелот.
Според МВР, тој бил долг околу 40 метри и лоциран близу објект кој се користел за одлагање на јаглен во правец на заштитната ограда зад која се наоѓа женското одделение во затворот, а во непосредба близина на зградата на затвореното одделение во „Идризово“.
Во меѓувреме, премиерот Димитар Ковачевски денеска на прес-конференција соопшти дека на седница на Владата е разрешен сега веќе поранешниот директорот на затворот „Идризово“, Шпенд Тахири. На негово место, на предлог на Ковачевски, за нов в. д. директор на Казненопоправниот дом е именуван генерал-мајор Зоран Јовановски, кадар со богата кариера во Министерството за внатрешни работи.