Законските измени, кои се одобрени од Лукашенко, предвидуваат смртни казни за службеници и војници за кои се смета дека предизвикале ненадоместлива штета на националната безбедност на Белорусија
Претседателот на Белорусија, Александар Лукашенко, потпиша нацрт-закон со кој се воведува смртна казна за државните службеници и воениот персонал осудени за велепредавство.
Белорусија, која е близок сојузник на Русија, е единствената земја во Европа која сè уште ја применува смртната казна која веќе постои за злосторства како убиство или за акти на тероризам. Егзекуциите се вршат со еден истрел во задниот дел од главата на осуденикот.
Измените на Кривичниот законик на земјата, кои ги одобри Лукашенко во четвртокот, предвидуваат смртни казни за службеници и војници за кои се смета дека предизвикале ненадоместлива штета на националната безбедност на Белорусија. Законските измени се со цел зајакнување на борбата на Белорусија против „злосторствата на екстремистичка (терористичка) и антидржавна ориентација“.
Нацрт-законот одобрен од белорускиот лидер предвидува и затворски казни за секој што ќе биде прогласен за виновен за „пропаганда на тероризам, дискредитација на белоруските вооружени сили и паравоени единици и кршење на правилата за заштита на државните тајни“.
Русија донесе сличен закон по инвазијата на Украина пред нешто повеќе од една година.