Иницијатор за нападот на македонскиот клуб била Људмила Костадинова. Таа вели дека била револтиранa од начинот на кој македонските власти се однесувале кон бугарските граѓани на граничниот премин „Деве Баир“ и недејствувањето на бугарските власти
Двајцата мажи и двете жени, кои во саботата вечерта на денот на чествувањето на роденденот на Гоце Делчев со камења ја нападнаа канцеларијата на Македонскиот културен центар во Благоевград, се пуштени од притвор без пријава. Станува збор за двајца вработени во Општинското претпријатие „Озеленување“ на Општина Благоевград и нивните сопруги.
Тие во изјава за телевизија Нова велат дека го сториле тоа бидејќи биле револтирани од начинот на кој македонските власти се однесувале кон бугарските граѓани на граничниот премин „Деве Баир“ и недејствувањето на бугарските власти.
Иницијатор за нападот на македонскиот клуб била Људмила Костадинова.
„Јас сум иницијатор за тоа што се случи. Ова не е вандалски чин. Ја покажавме нашата длабока огорченост и незадоволство од случувањата на бугарско-македонската граница. Нашите граѓани и нашата држава беа понижени од РСМ. Бев револтирана поради тоа, како и поради репресиите што им се вршат постојано на македонските Бугари и фактичкото недејствување на бугарските власти. Истиот ден го нападнавме клубот. Да, јас имав желба и им дадов идеја на другите и тргнав реално сама. Луѓето што ги гледате до мене ме поддржаа, тоа се мои пријатели кои не ме оставија да отидам сама“,
изјави Костадинова за Нова.
На прашањето дали постоел друг начин да ја изразат својата реакција, наместо со агресија, Костадинова рече:
„За жал, не, само говор и изјави не ни помагаат. Ние имавме сила да избркаме половина луѓе од амбасадата на една економски и воено силна држава како Русија, а не можеме да се справиме со Македонија? Се покренува прашањето чии геополитички интереси штитиме и за што“.
Станислав Илиев и Николај Иванов изјавија дека го делат мислењето на Костадинова и потврдија дека учествувале во чинот.
„Не можам да се сетам дали сите фрлавме камења, како што рече Костадинова, таа фрли камен, таа го искрши стаклото“,
изјави Илиев.
Иванов додаде дека направиле симболичен акт со цел да му покажеле на бугарското општество дека сè уште постојат будни Бугари бидејќи држава веќе абдицирала по однос на македонското прашање.
Костадинова рече дека ја платиле штетата за искршеното стакло со пари собрани од граѓани од целата Општина Благоевград.
Градоначалникот на Благоевград Илко Стојанов, вчера изјави дека ќе ги казни вработените што фрлале камења на македонскиот клуб како што Скопје ги казнува цариниците и полицајците.
„Доколку се докаже вината на општинските службеници, ќе го применам принципот на реципроцитет на казните, тоа значи дека ќе ги казнам оние што работат во општина Благоевград со точно иста казна како што ќе бидат казнети цариниците, граничната полиција и други функционери во Република Северна Македонија кои предизвикаа ментално и физичко насилство врз многу Бугари. Во моментот кога ќе бидат отпуштени вработените во Северна Македонија кои ги малтретираа бугарските граѓани, веднаш ќе ги отпуштам вработените во ОП ‘Озеленување’ на Општина Благоевград“,
рече градоначалникот Стојанов.
Македонскиот клуб во Благоевград беше вандализиран на 4 февруари, кога во Скопје се чествуваше 151-годишнината од раѓањето на великанот Гоце Делчев. Вандалскиот чин бил пријавен вечерта во 21:40 часот во локалната полициска станица откако полициската патрола видела дека е скршено стаклото на клубот.