Освен бугарско државјанство, бугарското МНР на Пендиков ќе му обезбеди и стан во кој ќе биде привремено сместен додека е во Бугарија, а според најавите, можно е да добие и свое лично обезбедување зашто, како што изјави шефот на бугарската дипломатија, Пендиков стравувал за својот живот доколку се врати во Северна Македонија
Секретарот на бугарскиот клуб „Цар Борис Трети“ во Охрид, Христијан Пендиков, кој со бугарски владин авион беше пренесен во Бугарија по неговото претепување во Охрид, во најбрз можен рок ќе добие бугарско државјанство. Ова денеска го најави в.д. министерот за надворешни работи на земјата Николај Милков за време на прес-конференцијата во Министерството, пренесе БНТ.
Освен бугарско државјанство, бугарското МНР на Пендиков ќе му обезбеди и стан во кој ќе биде привремено сместен додека е во Бугарија, а според најавите, можно е да добие и свое лично обезбедување зашто, како што изјави шефот на бугарската дипломатија, Пендиков стравувал за својот живот доколку се врати во Северна Македонија.
Бугарските медиуми јавија дека Пендиков вчера бил отпуштен од Воено-медицинската академија (ВМА) во Софија каде што беше хоспитализиран по нападот во Охрид.
Откако ја напуштил болницата, секретарот на бугарскиот клуб вчера се сретнал со претседателот на Бугарија, Румен Радев, во претседателскиот кабинет. Според соопштението објавено на веб-страницата на претседателството на Бугарија, Радев упатил честитки до мајката на Пендиков што одгледала достоен син, а нему му честитал за храброста да го одбрани своето бугарско име.
Радев го уверил Пендиков оти Бугарија нема да толерира насилство врз Бугарите во Северна Македонија и врз нејзините граѓани и ќе ги користи сите национални и меѓународни инструменти за заштита на нивните права.
Нагласил и дека Бугарија ќе ги следи постапките на институциите во земјава за тоа дали го гарантираат животот и здравјето на своите граѓани кои, како што посочил Радев, и покрај системската репресија, продолжуваат да го бранат својот бугарски национален идентитет.
„Институциите во РСМ мора со дела да докажат дека не се соучесници во децениската омраза кон Бугарија, чиј резултат е палењето и пукањето во културните клубови и насилството врз македонските Бугари и бугарските граѓани. Одговорните за тоа треба да бидат разоткриени и ефективно казнети“,
порачал Радев за време на средбата со Христијан Пендиков.
Односот на Северна Македонија кон македонските Бугари, посочил бугарскиот претседател, е од клучно значење не само за билатералните односи со Бугарија, туку и за нејзината европска перспектива.