„Бев информиран за ова откритие и се изненадив кога дознав дека има некои владини досиеја кои се однесени во таа канцеларија. Но, не знам што има во документите“, рече Бајден и додаде дека се надева оти ревизијата наскоро ќе биде завршена
Американскиот претседател Џо Бајден рече дека е изненаден поради откритието на потенцијално доверливите документи од времето кога тој беше потпретседател на САД и додаде дека не е запознаен со нивната содржина.
„Бев информиран за ова откритие и се изненадив кога дознав дека има некои владини досиеја кои се однесени во таа канцеларија. Но, не знам што има во документите. Целосно соработуваме со ревизијата“,
рече Бајден и додаде дека се надева дека таа наскоро ќе биде завршена.
Белата куќа претходно информира дека американското Министерство за правда разгледува потенцијално доверливи документи од времето кога Џо Бајден беше потпретседател на САД, кои биле пронајдени во неговата поранешна канцеларија во невладина организација во Вашингтон.
Специјалниот советник на Бајден, Ричард Заубер, рече дека адвокатите на претседателот ги откриле документите минатиот ноември додека го расчистувале канцелариски простор и ги предале на Националниот архив. Тој рече дека во заклучениот кабинет во Центарот Пен Бајден (истражувачки центар поврзан со Универзитетот во Пенсилванија) биле пронајдени „мал број доверливи документи“.
Бајден имаше канцеларија во центарот од кога ја напушти потпретседателската функција во 2017 година до започнувањето на неговата претседателска кампања во 2019 година.