Ова е мојот последен мандат, нема да го менувам Уставот, ништо слично. Во првата половина на следната година нема да бидам ни претседател на политичка партија, рече Вучиќ на своето годишно обраќање до јавноста
Претседателот на Србија, Александар Вучиќ изјави дека нема да го менува Уставот на Србија за да биде претседател повеќе од два мандата. Тој рече и дека „во првата половина на следната година“ повеќе нема да биде претседател на политичката партија.
„Ова е мојот последен мандат, нема да го менувам Уставот, ништо слично. Во првата половина на следната година нема да бидам ни претседател на политичка партија“,
рече Вучиќ на своето годишно обраќање до јавноста.
Тој оцени дека 2023 година ќе биде потешка од 2022 година во Европа и светот, а тоа ќе ја погоди и Србија.
Вучиќ рече дека Србија денеска има 580 милиони кубни метри гас и дека кога ќе заврши зимата, Банатски двор ќе остане полн, а дополнителни количини гас ќе останат во складиште во Унгарија.
Претседателот најави дека Србија ќе го продолжи договорот со Унгарија за складирање гас, „за да биде подготвена за следната зима“.
Зборувајќи за цената на струјата, тој рече дека таа ќе биде „втора најниска во Европа“. Тој најави и дека државните органи ќе се борат за одржување на низок процент на невработеност, кој според него е рекордно низок.
Покажувајќи графикони со статистички податоци, Вучиќ зборуваше за економијата, безбедноста, наталитетот.
Тој најави дека српската војска ќе го зголеми бројот на припадниците на специјалните единици од 1 600 на 5 000 и дека основната плата ќе биде 2 000 евра, а со прекувремена работа и бонуси до 3 000 евра.
Говорејќи за природниот прираст Вучиќ рекол дека не треба кучињата да се сакаат повеќе од децата.
Тој исто така рече дека миграцијата не е проблем за Србија и дека е помала отколку во Северна Македонија, Хрватска, БиХ.
Исто така, Вучиќ посочи дека девет земји ја повлекле независноста на Косово и дека ја чекаат десеттата.