Аргентина по третпат стана светски шампион во фудбал, со победата на Франција во финалето на Светското првенство во Катар. Во спектакуларниот натпревар со продолженија и 120 минути игра, натпреварот беше 3:3, но решвачката победа за Аргентина ја донесоа пеналите кои завршија со 4:2.
Аргентинците комплетно доминираа во првиот дел и поведоа во 23. минута преку Лионел Меси од пенал, откако претходно Усман Дембеле го фаулираше Ди Марија.
Само 13 минути подоцна Ди Марија го удвои водство на асистенција на Алексис Мек Алистер во акција која од средината на теренот ја започна Меси.
Франција прв пат упати директен удар кон противничкиот гол во 80. минута кога Килијан Мбапе од пенал ја преполови негативата, а само 60 секунди подоцна напаѓачот на ПСЖ го израмни резултатот со својот втор гол на натпреварот.
Меси во 110. минута од продолжението повторно ѝ донесе водство на Аргентина, но Мбапе пет минути подоцна израмни од пенал и стана само втор играч кој постигнал хет-трик од игра во финале на светските првенства.
Во пенал серијата за Аргентина беа прецизни Меси, Дибала, Паредес и Монтиал, додека во францускиот состав реализираа Мбапе и Коло Муани, но аргентинскиот голман го одбрани ударот на Коман, а Чуамени биеше непрецизно.
За Аргентина, која го играше своето шесто мундијалско финале, ова е прва светска титула по пауза од 36 години, а нејзиниот капитен Лионел Меси дојде до единствениот трофеј што му недостасуваше во неговата кариера.