Старо-новиот претседател на Здружението на новинарите (ЗНМ), Младен Чадиковски, по денешниот реизбор вели дека е среќен што новинарите се обединиле, и што годинашното, изборно собрание на ЗНМ е еден од најголемите новинарски собири, каде над 450 новинари, сниматели и фоторепортери, на фер и демократски начин го искажале своето мислење за тоа каде треба да се движи новинарството.
„Сето она што ќе значи дел од органите на ЗНМ, во иднина ќе продолжи да работи на принципите на професионалност, на правда, на етика во новинарството, со намера да го засилиме и зголемиме потенцијалот на македонските новинари, сниматели и сите медиумски работници, за да можеме најверно да им служиме на оние за коишто постоиме, на граѓаните“,
изјави Чадиковски.
Тој вели дека новинарите мора да работат за граѓаните, почитувајќи ги сите стандарди и принципи.
„Во наредниот период продолжуваме да работиме посилно, подобро. Сите идеи од медиумските работници се добредојдени, ЗНМ е отворено за сите и ќе остане така и понатаму“,
порача реизбраниот претседател.
Младен Чадиковски победи во првиот круг од гласањето за претседател, со освоени 275 гласа, наспроти противкандидатот Марјан Николовски кој освои 119 гласа, и Фиљана Кока која ја поддржаа 53 делегати. Вкупно 11 ливчиња за избор на претседател на ЗНМ биле неважечки.
Покрај за претседател, членовите на Здружението гласаа и за Управен и Надзорен одбор, како и за нов состав на Советот на честа. Гласовите за управните тела допрва ќе се бројат.