Пакетот воена помош вклучува четири фрлачи ХИМАР со придружни проектили, 32 хаубици со 75 000 парчиња муниција, 200 возила отпорни на мини (МРАП) и противпешадиски мини, се наведува во соопштението од Белата куќа
Американскиот претседател Џо Бајден му соопштил на украинскиот претседател Володимир Зеленски дека Вашингтон ќе му даде на Киев 625 милиони долари нова безбедносна помош, вклучително и артилериски ракетни системи за висока мобилност (ХИМАР), соопшти Белата куќа.
Американскиот претседател нагласил дека Вашингтон никогаш нема да ја признае руската анексија на украинска територија.
Бајден „вети дека ќе продолжи да ја поддржува Украина додека таа се брани од руската агресија онолку долго колку што е потребно“, се вели во соопштението.
Тоа е првиот пакет на американска воена помош откако Русија објави анексија на украинска територија.
Во соопштението се појаснува дека пакетот воена помош вклучува четири фрлачи ХИМАР со придружни проектили, 32 хаубици со 75 000 парчиња муниција, 200 возила отпорни на мини (МРАП) и противпешадиски мини.
Минатата недела, САД го претставија пакетот оружје за Украина во вредност од 1,1 милијарда долари, кој вклучува 18 ХИМАРИ, различни системи против беспилотни летала и радари.
САД ветија дека ќе испратат 20 ХИМАРИ во Украина користејќи го овластувањето за забрзана испорака на оружје на претседателот без одобрение од Конгресот (PDA).
Севкупно, САД испратија помош во вредност од 16,8 милијарди долари за Украина од почетокот на руската инвазија на 24 февруари.
Минатата недела Русија прогласи анексија по референдумот на окупираните територии на Украина. Западните влади и Киев велат дека гласањето било принудно и нерепрезентативно и дека референдумите се кршење на меѓународното право.