Министерот за транспорт и врски Благој Бочварски се оженил во мај, а веќе во јуни неговата сопруга се вработила во штипската болница, кажа на денешната прес-конференција еден од портпаролите на ВМРО-ДПМНЕ, Наум Стоилковски, обвинувајќи дека власта продолжува со непотистички вработувања.
„Штипската болница не е изградена но, тоа не го спречува министерот за транспорт и врски, Благој Бочварски, од антиамакедонската, клептоманска СДС, токму таа болница да е местото каде на најбрз можен начин се вработува неговата сопруга. Тоа што дополнително боде очи во овој случај е што истовремено во штипската болница се ухлебени и сопругата на Бочварски и нејзината сестра, веднаш од клупа, по дипломирање, односно по неполни три месеци стаж во приватна здравствена установа“,
обвини Стоилковски.
Од ВМРО-ДПМНЕ велат дека вработените се примени без распишан оглас на штипската болница.
„Дали е точно дека сопругата на Бочварски и нејзината сестра немале шестмесечен работен стаж во приватна установа пред да бидат вработени во штипската болница без оглас? Дали е точно дека Бочварски ја злоупотребил својата позиција како министер за да го изигра системот и без распишан оглас неговата сопруга и нејзината сестра да се вработени во штипската болница? И последно, дали и како е можно, без работен стаж од шест месеци, ухлебена во јуни, сопругата на Бочварски да користи годишен одмор во август?“,
праша Стоилковски.