Тој додаде дека знаењето е клучно за надминување на предизвиците што ги носи ова време, а предизвиците, како што посочи, се огромни. Со заеднички напори, истакна премиерот, ќе можеме да најдеме решение за сè она што стои пред нас и да постигнеме напредок
Енергетската криза со која се соочуваат Северна Македонија, Европа и светот претставува сериозна закана за образовниот процес. За да се постигнат долгорочните цели, мора прво да се осигуриме дека ќе имаме доволно ресурси за да се обезбедат основни услови за живот и работа, како што се топли и добро осветлени училници и топли и добро осветлени домови за нашите ученици да имаат непречено квалитетно образование зимава.
Ова го посочи премиерот Димитар Ковачевски во обраќањето од Самитот за трансформација на образованието во рамки на 77. Генерално Собрание на ООН во Њујорк.
„Одговорот на овие предизвици може да се најде само во взаемна меѓународна и меѓурегионална соработка. Но најмногу од сè, може да се најде во солидарноста. Ако сакаме нашите ученици да пораснат со добро образование, мора прво да им покажеме како ние возрасните можеме заедно да ги решиме проблемите. Во спротивно, ниту еден образовен модел или развојна стратегија нема да направи никаква разлика, ниту нешто ќе им значи“,
посочи Ковачевски.
Тој додаде дека знаењето е клучно за надминување на предизвиците што ги носи ова време, а предизвиците, како што посочи, се огромни. Со заеднички напори, истакна премиерот, ќе можеме да најдеме решение за сè она што стои пред нас и да постигнеме напредок.
Во своето обраќање Ковачевски нагласи оти Северна Македонија има долг пат кон нивото на образование со кое тој би бил задоволен, додавајќи оти нашата трансформација во формална земја членка на ЕУ лежи во нашата способност да ги согледаме недостатоците и да сфатиме дека нашата иднина зависи од самите нас и нашите постапки. Поради тоа, како што додаде, посветени сме на создавање услови и средина што ќе им овозможи на нашите ученици и студенти да напредуваат и да ги постигнат своите потенцијали.
„Воведовме целосно нова наставна програма за прво и четврто одделение од основното образование со која се менува пристапот на предавање. Оваа програма се заснова на охрабрување на критичкото размислување што, само по себе е сеопфатна цел за целокупниот образовен процес.
Следејќи ја заложбата за обезбедување правично образование, ја унапредуваме инклузивноста, притоа мотивирајќи ги учениците да учат да живеат заедно. Со оглед на тоа дека сме успешен модел за мултиетничко општество, посветено работиме кон постигнување социјална интеграција во етнички, културолошки и општествен аспект. Се вработуваат образовни асистенти кои треба да им дадат директна поддршка во училницата на ученици со попреченост во редовните основни училиште. Обезбедивме учебници во електронска и аудио форма, како и со Брајово писмо за децата со атипичен развој.
Посветени сме на надминување на разликите што потекнуваат од разликите во приходите; воведовме субвенционирани оброци за секој ученик. Тоа е дел од нашите напори за обезбедување еднаков пристап до оброци за младите лица на универзитетите. Покрај тоа, секоја година се даваат стипендии за учениците од средните училишта, како и за универзитетските студенти, на различни основи, како на пример, врз основа на приходите или академскиот успех.
Работиме на унапредување на средното стручно образование со цел студентите кои немаат намера да продолжат со универзитетско образование да ги стекнат неопходните квалификации. Тоа е нашиот придонес кон целта да се учи за да се прави. Водени од начелото на доживотно учење, креирајќи различни програми го олеснивме преквалификувањето и дополнувањето на квалификациите, што помага брзо стекнување вештини и знаење во професиите кои се бараат на нашиот пазар на труд.
Поучени од лекциите научени во текот на справувањето со пандемијата, ги насочивме нашите напори на обезбедување на неопходните ИТ уреди, интерактивни училишни табли, помагала, како и опрема за кабинетите за специфични предмети, сé со цел да се обезбеди дигитална настава. Подготвени сме постојано да инвестираме во зацврстување на дигиталните компетенции на наставниците и подобрување на дигиталната инфраструктура во училиштата.
Со оглед на фактот дека научните иновации станаа главен предуслов за напредок, минатата година за првпат воведовме стипендии за третиот циклус на студии во научните области од природните науки, математиката и техничко-технолошките науки. Учењето да се биде бара развивање на иновација и креативни потенцијали, особено за младите луѓе. Затоа, сериозно инвестираме во таа област.
Би сакал да го подвлечам и развојот и спроведувањето на проектот за соработка меѓу универзитетите во Северна Македонија и универзитетите од другите балкански земји, како и универзитетите во Италија и Грција. Овој проект се спроведува во рамки на Стратешкото партнерство Еразмус за постдипломските студии и е насловен „Геофилозофија на Балканот“. Ова е исклучително важен проект имајќи предвид дека се работи за прва таква регионална соработка во образованието“,
истакна премиерот Ковачевски во своето обраќање на Самитот на за трансформација на образованието во рамки на 77. Генерално Собрание на ООН во Њујорк.
Ковачевски посочи дека политиките што се спроведуваат се во согласност со глобалните заложби за развивање на образовен систем што помага да се изгради општество што ќе може ефективно да се справи со новите предизвици.
„Веќе со децении во мојата земја се спроведувале различни образовни модели и се воведувале многу промени. Сепак, во согласност со досегашната дискусија на оваа дебата, верувам дека со фокусирано спроведување на Националната стратегија за развој 2022-2024 и тековната Стратегија за образование 2018-2025 ние го поставуваме нашиот образовен систем на вистинскиот пат кон развој“,
додаде премиерот.
Ковачевски утрово по локално време ќе присуствува на отворањето на Генералното Собрание на Обединетите Нации во Њујорк, a како што информира владината прес-служба, премиерите и шефовите на држави ќе ги пречека генералниот секретар на Обединетите Нации, Антонио Гутереш.
Со ова почнува генералната дебата на 77. Генерално собрание на Обединетите нации.
Годинашната сесија на Генералната асамблеја на ОН е со тема „Tрансформативни решенија на испреплетени предизвици“, во рамки на 77. Генерално собрание кое е фокусирано на темата: „Решенија преку солидарност, одржливост и наука“.
За попладне по локално време во Њујорк предвидено е премиерот Ковачевски, заедно со останатите негови колеги од Западен Балкан да присуствуваат и на работен ручек, организиран од високиот претставник на Европската Унија за надворешна политика и безбедност и потпретседател на Европската Комисија, Жозеп Борел.