Дали прогласувањето кризна состојба е се со цел да се справи државата со енергетската криза или на новоформирани фирми да им се делат милионски тендери за ископ и транспорт на јаглен, праша Мицевски
Координаторот на пратеничката група на ВМРО-ДПМНЕ, Никола Мицевски во вечерашното интервју за Сител најави дека пратеничката група на ВМРО-ДПМНЕ ќе побара формирање на анкетна комисија за разгледување на состојбите во енергетскиот сектор, потенцирајќи дека владата нема стратегија и план како да се справи со кризата.
„ВМРО-ДПМНЕ во наредниот период ќе побара формирање на анкетна комисија за состојбите во енергетскиот сектор, односно што е преземено, или што не е преземено во овој период кога цела Европа и цел свет активно се подготвува за зимата која што не очекува, а која што според сите показатели ќе биде катастрофална и многу лоша по однос на обезбедување на енергија и енергенси за граѓаните“,
порача Мицевски.
Мицевски упати прашање до Владата, дали прогласувањето кризна состојба е се со цел да се справи државата со енергетската криза или на новоформирани фирми да им се делат милионски тендери за ископ и транспорт на јаглен.
„Што има преземено владата во овој период? Дали единствено прогласувањето кризна состојба им е со цел да можат тие договори за транспорт на фирми да продолжат да ги работат во четири очи и дали ќе продолжат со нивната тенденција, а тоа е да новоформирани фирми во државата добиваат милионски тендери за ископ и транспорт на јаглен“,
рече Мицевски.