Синодот апелира да не се наштетува на процесот на признавањето на автокефалниот статус на МПЦ-ОА преку, како што се наведува, неупатени и злонамерни коментари и нецелосни и умислено искривени информации на поедини таканаречени експерти и аналитичари
Светиот синод на Македонската православна црква-Охридска архиепископија (МПЦ-ОА) ), денеска на својата редовна седница ја поздрави одлуката на Руската православна црква (РПЦ) за признавање на автокефалноста на МПЦ-ОА.
„Светиот Синод со голема радост и благодарност ја прими веста за прифаќањето на автокефалниот статус на Македонската православна црква-Охридска архиепископија од страна на Руската православна црква-Московска патријаршија (РПЦ – МП) на заседанието на Синодот на РПЦ од 25 август 2022 година, запишувајќи го името на нејзиниот Поглавар, Неговото Блаженство, Архиепископ Охридски и Македонски г. г. Стефан во свештениот диптих“,
се наведува во соопштението од САС на МПЦ-ОА.
Во соопштението на МПЦ-ОА се додава оти одлуката на Синодот на РПЦ следи по обраќањето на српскиот патријарх г.г. Порфириј соопштувајќи ја веста на рускиот патријарх г. г. Кирил за автокефалниот статус на сестринската Македонска православна црква.
„Исто така, Синодот на МПЦ-ОА им благодари на сите други помесни православни цркви кои го прифатија актот на цариградскиот патријарх“,
се наведува во соопштението.
Истовремено Синодот апелира да не се наштетува на процесот на признавањето на автокефалниот статус на МПЦ-ОА преку, како што се наведува, неупатени и злонамерни коментари и нецелосни и умислено искривени информации на поедини таканаречени експерти и аналитичари.