Доколку лидерите на Г7 би ја соблекле облеката на неодамнешниот самит во Германија, тоа би било „одвратна глетка“, смета рускиот претседател Владимир Путин. Лидерите на Г7 додека позираа за заедничка фотографија, се пошегуваа околу склоноста на Путин кон фотографии без маица.
„Не знам како планирале да се соблечат, над или под струкот“,
додаде Путин пред новинарите при својата посета на Туркменистан, но, според него, „во секој случај тоа би било одвратна глетка“.
Путин потоа ги советуваше лидерите на Г7 дека потребно е вежбање и помалку пиење за постигнување хармонија меѓу телото и душата, јави руската новинска агенција Тасс.
Британскиот премиер Борис Џонсон во неделата, додека седеше заедно со своите колеги, лидери од Г7, праша дали треба на фотографијата да биде со јакна.
„Мораме да покажеме дека сме поцврсти од Путин“,
рече Џонсон.
Премиерот на Канада, Џастин Трудо тогаш се пошегува дека за тоа би било потребно „јавање со голи гради“, мислејќи на честите пози на Путин за „мачо“ фотографии, како кога јава коњ без маица.
Инаку, лидерите на седумте најбогати земји во светот, на Г7 самитот разговараа за напорите за понатамошна изолација на Русија поради нејзината инвазија на Украина. Велика Британија, Канада, Јапонија и Соединетите држави најавија чекори за забрана на увоз на руско злато. Г7 ги вклучува и Франција, Италија и Германија.