Министерот за надворешни работи Бујар Османи на својот фејсбук профил објави две страници од документ за кој вели дека во физичка форма недостасува во МНР
Министерот за надворешни работи, Бујар Османи, вечерва на својот фејсбук-профил објави документ од две страници, како и објаснување за тоа што досега нашата земја има потпишано со Бугарија како Протокол, кој, како што вели, е потпишан од неговиот претходник, чие име не го споменува.
„Досега имаме потпишан само еден Протокол, потпишан токму од мојот претходник, во кој има неколку јасни обврски кои, за жал, само сме се обврзале, но не сме ги реализирале: Првата е дека го прифаќаме бугарското гледиште кон Илинденското востание, прифаќајќи ја номенклатурата ‘Илинденско-Преображенско востание’, создавајќи со тоа рамка во која Комисијата се очекува да делува, што, пак, создава тешкотии во нивната работа, но воедно и веќе создала преседан во односите со Република Бугарија дека историските прашања може да ги решаваме политички, наместо да ѝ ги оставиме на Комисијата. Второ, потпишувајќи го единствениот Протокол, мојот претходник ја обврзал и Комисијата, но и земјата, пред целиот свет, дека имаат краток рок до крајот на 2019 година, да најдат решение за Гоце Делчев и востанието, сега веќе и дефинирано согласно бугарската позиција како ‘Илинденско-Преображенско'”,
наведува Османи во постот.
Понатаму, Османи вели дека не смета дека неговиот претходник имал лоши намери тогаш, но нема да го премолчи, како што вели, „неговиот обид сега да се ‘пенави’ на нашиот обид да направиме пристоен Протокол, во кој нема да се обврземе за содржината, туку за принципите на нашата работа, претставувајќи нѐ сега нас како предавници на неговиот потпис“.
„Мислев дека ќе можам да ја задржам дипломатската пристојнос и да не говорам за отстранувањето на документите од архивата на МНР пред моето доаѓање во куќата, но кога ќе се поминат црвените линии на пристојност, сите треба да ги отвориме картите до крај… Ќе продолжиме со нашата работа без разлика колкава хистерија ќе создаде мојот претходник. Ќе обезбедиме пристојно решение со Република Бугарија, но и европска иднина за земјата“,
пишува Османи на Фејсбук.
На крајот од постот Османи посочува дека овој документ што го презентира, како што вели, „во неговата физичка форма недостасува во МНР,”. ,,Очекувано е кој си го земал пред да си отиде и со какви намери“, вели Османи.
Претходникот на Османи, Никола Димитров, претходно денеска на својот фејсбук-профил објави подолг пост со наслов „Итна реафирмација на македонските позиции!“.
„Очајот на (дел од) владата за лажен успех оди дотаму што четирите услови на премиерот гласно и јасно изговорени од сред Брисел, се стопија прво на два зборови, ‘протокол’ и ‘отворање’, па за 24 часа само на еден збор ‘протокол’. Од повикот на шефот на дипломатијата пред три дена бугарскиот парламент да не го усвојува предлогот бидејќи тоа ‘ќе го блокира долгорочно европскиот процес’ за само еден ден потоа токму усвојувањето на предлогот стана ‘голем напредок’. Ако потрае оваа агонија на игра со зборови и позиции уште малку, веројатно предлогот ќе им стане целосно прифатлив и ваков каков што е, а од историското НЕ ќе остане само горчливата прашина. За жал, ако навистина дојде до тоа – ќе ја дишеме сите долго, заглавени во ќорсокакот“,
напиша Димитров.
Затоа, тој смета дека најитно е потребна гласна реафирмација на македонските позиции и дома и надвор, за да ги чујат сите кои можеби не сакале да ги слушнат, вклучувајќи го и еврокомесарот Вархеји, па прашува: во вакви услови, кога јавноста е оставена да се храни само со полуинформации, како очекувате да нема грижи и дилеми?
„Абе за НАС се работи, за секој од нас. Има да одговарате на секое ново прашање, а не уште да обвинувате. Па, министри кои се закануваат со кривичен прогон на свесни граѓани кои целосно се вложиле да спречат национална катастрофа нагалено наречена ‘државна стратегија’ нарекувајќи го тој автентичен чин ‘хибриден напад’ треба веднаш да ги снема од владата. Ако тоа не се случи, одговорноста ќе падне на целата влада“,
пишува Димитров.
„Имаше две неспорни области на напредок последниве години, токму надворешната политика и слободата. Како стоиме денес нервозни господа во тие области, ако надворешната политика дозволи ваков дебакл што го гледаат сите со отворени очи, и дома и надвор, распрскувајќи ги македонските црвени линии на парчиња, а министри се закануваат токму кон слободните граѓани кои се обидуваат да ја намалат штетата,што веќе секако е огромна?“,
пишува Димитров.