Шолц, покрај Белград, ќе ја посети и Приштина, а патувањето има тенденција да прерасне во мала балканска турнеја со посети на Тирана и Скопје, а можеби и Сараево, велат српски дипломатски извори за Дојче веле
Канцеларот Олаф Шолц треба да ги посети Србија и соседството на 10-ти јуни, објави Н1, повикувајќи се на српски дипломатски извори на Дојче веле, кои велат дека целта е добра подготовка за самитот во Берлинскиот процес.
„Се стремиме кон тој датум, посетата допрва треба да се координира со другите земји од регионот“,
вели изворот.
Според овој извор, Шолц, покрај Белград, ќе ја посети и Приштина, а патувањето има тенденција да прерасне во мала балканска турнеја со посети на Тирана и Скопје, а можеби и Сараево.
Претходно новинарот на „Франкфуртер алгемајне цајтунг“, Михаел Мартенс на Твитер објави дека Шолц доаѓа во Белград на 10 јуни. Повикувајќи се на сигурни извори од Берлин, тој изјави дека темите ќе бидат „енергијата, економијата, позицијата на Србија кон Русија“ и други.
Извор на ДВ вели дека Шолц се обидува добро да се подготви за самитот на Берлинскиот процес, кој најверојатно ќе се одржи во август.
„За разлика од поранешната канцеларка Меркел, Шолц повеќе се движи кон конкретни решенија. Тој се грижи овој самит да не е само скапо патување, туку да се постигнат конкретни решенија“,
велат изворите.
Целта на Берлинскиот процес е поблиско поврзување на регионите на Западен Балкан, преку слободен проток на луѓе, стоки, капитал и услуги.
Покрај обидот да го вклучи Белград во санкции против Русија, Шолц ќе се обиде да понуди нешто и на Албанија и Северна Македонија, велат упатените.
Посетата на Шолц на Балканот се смета за нов доказ дека регионот е високо на листата на приоритети на новата коалиција во Берлин. На почетокот на мај, српскиот претседател Александар Вучиќ и косовскиот премиер Албин Курти го посетија Берлин.
Тогаш беше оценето дека Владата на Шолц придава големо значење на косовскиот проблем во светлината на војната во Украина. Шолц тогаш за прв пат рече дека „взаемното признавање“ треба да биде дел од сеопфатниот договор меѓу Белград и Приштина.