Јас и бугарскиот премиер имаме редовна комуникација која се одвива на различни теми и, со оглед на тоа што и тие се во Рим, ќе имаме средба на која ќе стане збор за напредокот на разговорите меѓу министерствата за надворешни работи, изјави Ковачевски по приемот кај папата
Премиерот Димитар Ковачевски, кој денеска е во Ватикан и во Рим по повод чествувањето на светите браќа Кирил и Методиј, потврди дека попладнево ќе има средба со бугарскиот премиер Кирил Петков, но без детали за што конкретно ќе се разговара.
„Јас и бугарскиот премиер имаме редовна комуникација која се одвива на различни теми и, со оглед на тоа што и тие се во Рим, ќе имаме средба на која ќе стане збор за напредокот на разговорите меѓу министерствата за надворешни работи“,
изјави Ковачевски по приемот кај папата во Ватикан.
Бугарски Дневник.бг наведува дека ова патување на премиерите ќе го одбележи спорот помеѓу двете држави и бугарското вето за старт на преговорите на Северна Македонија со ЕУ, како и дека според непотврдени информации пред извесно време било разговарано Петков и Ковачевски за време на ова патување да објават напредок во разговорите или решение кое би водело кон укинување на ветото.
Ковачевски не сакаше да ги коментира пишувањата на бугарските медиуми и истакна дека поради тоа што средбата во Ватикан траела два часа не успеал да види за што се работи.