Дискусиите се водат меѓу советниците на рускиот и украинскиот претседател, што не одговара на нивото на министрите за надворешни работи кои се состанаа во Турција за неуспешните мировни преговори претходно овој месец
Истанбул денеска ќе биде домаќин на нова рунда мировни преговори меѓу Русија и Украина.
Преговорите меѓу руската и украинската делегација ќе започнат во 9:30 часот, соопшти вчера кабинетот на турскиот претседател во Палатата Долмабахче, зад затворени врати.
Турскиот претседател Реџеп Тајип Ердоган и рускиот лидер Владимир Путин вчера разговараа телефонски, но јавно не кажаа кога оваа недела ќе почнат разговорите.
Дискусиите се водат меѓу советниците на рускиот и украинскиот претседател, што не одговара на нивото на министрите за надворешни работи кои се состанаа во Турција за неуспешните мировни преговори претходно овој месец.
Украинскиот претседател Володимир Зеленски рече дека е подготвен да размисли за неутралност, но не пред референдум или повлекување на руските трупи.
„Претстои нова рунда преговори, затоа што ние се стремиме кон мир, навистина, без одлагање. Како што ме информираа, постои можност и потреба за средба во четири очи во Турција. Тоа не е лошо. Да го видиме резултатот“,
рече тој во видеопорака, објавена рано утринава од претседателската канцеларија.
„Нашите приоритети во преговорите се познати. Суверенитетот и територијалниот интегритет на Украина се несомнени“,
рече тој.
Зеленски истакна дека „ефективните безбедносни гаранции“ за Украина се „задолжителни“.
„Нашата цел е очигледна – мир и што поскоро враќање на нормалниот живот во нашата земја“,
додаде тој.
Но надежите од преговорите сепак не се големи.
Улогата на Турција
Турција се позиционира како неутрален сојузник и на Украина и на Русија и клучен дипломатски партнер на влезот во регионот на Црното Море. Нејзината улога вклучува да биде домаќин на трипартитни разговори со министрите за надворешни работи на Украина и Русија во јужниот град Анталија и шатл-дипломатија за време на неодамнешните посети на Лавов и Москва. Турција ги смета разговорите за успешни, и покрај недостатокот на напредок околу главната дискусија за хуманитарните коридори.
Можноста да биде домаќин на украинскиот и рускиот преговарачки тим претставува чекор напред за вклучување на Турција во преговорите, откако украинскиот министер за надворешни работи Дмитро Кулеба рече дека рускиот министер за надворешни работи Сергеј Лавров дошол во Анталија на почетокот на овој месец „да разговара, а не да одлучува“, додавајќи дека е изненаден од недостигот на овластување на Лавров да преговара.
„Тајмс“, исто така, објави дека Роман Абрамович во Истанбул разговарал со украинскиот пратеник Рустем Умеров, нарекувајќи го Абрамович „неофицијален пратеник на претседателот Путин во разговорите со Украина“. Серијата разговори беше координирана од претседателскиот портпарол Ибрахим Калин, кој, наводно, предложил „Крим и Донбас да ги држи Москва под долгорочен „закуп“, сличен на британската контрола врз Хонг Конг од 1898 до 1997 година, со нивната иднина да се решава на подоцнежен датум“, според Тајмс.
Изнаоѓањето брзо решение за кризата во Украина е критично прашање за Турција, поради нејзината зависност од рускиот гас, како и од пченицата од двете земји во услови на продолжена економска криза во која вредноста на лирата само минатата година се преполови.
Калин за „Хуриет“ минатата недела изјави дека двете страни се „блиску до договор“ за клучните прашања, особено дека Украина нема да се приклучи на НАТО и за „демилитаризација“.
Украинскиот претседател Зеленски рече дека постои можност и потреба за средба во четири очи во Турција и дека тоа „не е лошо“.
Директните разговори меѓу рускиот претседател Владимир Путин и украинскиот Володимир Зеленски би биле „контрапродуктивни“, оцени рускиот министер за надворешни работи.
Зеленски и Путин се сретнаа само еднаш на разговори во Париз во 2019 година.