„Обвинителството сега ќе почне со собирање докази за наводите за воени злосторства, злосторства против човештвото или геноцид на кој било дел од украинската територија против кое било лице“, изјави главниот обвинител на Меѓународниот кривичен суд, Карим Кан
Обвинителот на Меѓународниот кривичен суд во Хаг, Карим Кан, синоќа соопшти дека отворил истрага за потенцијални воени злосторства во Украина откако Русија изврши воена инвазија врз земјата.
„При прелиминарното испитување на ситуацијата во Украина, мојата канцеларија најде основано сомневање дека таму се извршени кривични дела за кои е надлежен овој суд. Почнува активна истрага на барање на 39 земји членки на судот“,
изјави главниот обвинител на Меѓународниот кривичен суд, Карим Кан.
Обвинителството сега ќе почне со собирање докази за наводите за воени злосторства, злосторства против човештвото или геноцид на кој било дел од украинската територија против кое било лице, додаде Кан.
Обвинителот на овој суд, Британецот Карим Кан, потсети дека на 28 февруари обелоденил оти бара дозвола да покрене истрага за ситуацијата во Украина врз основа на претходните заклучоци на неговиот правен тим.
Украина е членка на Меѓународниот кривичен суд од 2014 година, по руската анексија на Крим, додека Русија не ја признава неговата јурисдикција.