Како што пишува „Дејли мејл“, од почетокот на нападот на Украина, 24 февруари, постоеле стравови дека руските сили би можеле да го убијат Зеленски
Украински официјални лица соопштиле дека е елиминирана група на чеченски борци кои планирале атентат на претседателот Володимир Зеленски, пренесува денеска „Дејли мејл“.
Секретарот на украинскиот Совет за национална безбедност и одбрана Алексиј Данилов во телевизиско обраќање изјави дека е елиминирана единица која се обидела да го убие украинскиот претседател.
Нешто порано, Рамзан Кадиров, лидерот на Чеченија, изјави дека се убиени неколку Чеченци во нападот на Русија на Украина.
„Веќе сме запознати со специјалната операција која требаше да ја изведе единица на силите на Кадиров. Информацијата ја добивме од претставници од руската Федерална безбедносна служба, која не сака да учествува во оваа крвава војна. Единицата на силите на Кадиров, која дојде да го убие нашиот претседател, сега е елиминирана“,
изјавил Данилов на ТВ-каналот „Украина 24“, а пренесе „Мирор“.
Тој додаде и дека единицата била поделена во две група и дека нивното движење будно се следело.
„Беа поделени во две групи, ги следевме. Едната група се најде на удар на огнот на украинските сили во близина на Гостомел, додека другата група и натаму е под лупа“,
истакнал Данилов.
Тој порачал и дека Украина нема никому да му го даде својот претседател.
Како што пишува „Дејли мејл“, од почетокот на нападот на Украина, 24 февруари, постоеле стравови дека руските сили би можеле да го убијат Зеленски, а самиот украински лидер во едно обраќање рекол дека тој е цел број еден за убијците на Кремљ.
„Јас сум цел број еден, а мојата сопруга и моите деца се цел број два“,
изјави Зеленски минатата недела.