Претседателот на РКЕ вели дека не верува оти Русија ќе ја стопира испораката на гас што би се одразило негативно врз економиите во цела Европа. Сепак, порача дека мора внимателно да ги трошиме и струјата и нафтените деривати. Цените на гасот, вели тој, се покачени за 30 отсто во споредба со минатиот понеделник
Мора како општество да научиме внимателно да ги трошиме енергенсите. И електричната енергија и нафтените деривати мора да се користат рационално, порача вечерва претседателот на Регулаторната комисија за енергетика (РКЕ), Марко Бислимоски во гостувањето во централниот дневник на Сител ТВ.
„Сите фјучерси на енергенсите се зголемени за четири пати. Светлото од тунелот не се гледа. Затоа мора како општество да почнеме рационално да ги користиме енергенсите и да штедиме“,
рече Бислимоски.
Тој не верува дека ќе се стопира испораката на природен гас, но вели дека сите потрошувачи кои го користат овој енергенс се должни да обезбедат резерви на алтернативно гориво. Оваа обврска, вели, е регулирана во законските прописи.
„Тоа алтернативно гориво е мазут. Тоа е механизам кој обезбедува да нема застој во испораката. Иако искрено не верувам дека ќе се стопира испораката на природен гас – тоа во цела Европа би се одразило негативно врз економиите. Берзите се покажаа осетливи на секоја информација и со пандемијата и сега со состојбата со Русија и Украина. Споредувајќи со минатиот понеделник има 30 проценти раст на цените. Не очекувам дека Русија ќе направи потег со кој ќе ја спречи испораката на природниот гас, не верувам во такво сценарио“,
нагласи Бислимоски.
Во однос на цените, очекува ниво исто како и во последните денови.