Полицијата исконтролирала 249 возила кои вршат јавен превоз на деца кон училиштата на 102 локации, информира МВР. Биле констатирани осум кривични дела, по член 284-а за вршење јавен превоз без соодветна документација и 48 прекршоци, од кои 29 од Законот за безбедност на сообраќајот на патиштата, 16 од Законот за возила, три од Законот за заштита на населението од заразни болести и слично.
Акциската контрола се одржала вчера во периодот од 12.00 до 15.00 часот на целата територија на државата.
Во станица за технички преглед биле упатени 41 возило, а од сообраќај биле исклучени 11 возила кои вршат јавен превоз поради техничка неисправност и други констатирани недоследности.
„За време на контролата на подрачјата на сите сектори за внатрешни работи биле легитимирани 277 полнолетни средношколци, а извршени се 2 211 прегледи кај ученици, во однос на почитување на Законот за оружјето, Законот за правда на детето и Кривичниот законик“,
велат од МВР.
Оттаму посочуваат дека по документирање на случаите, против сите одговорни лица кои сториле било каков прекршок или кривично дело ќе биде поднесена соодветна прекршочен или кривичен поднесок.